ទីបំផុតសភាប្រទេសតួកគីបានផ្តល់សច្ចាប័នឲ្យហ្វាំងឡង់ចូលជាសមាជិកអង្គការណាតូហើយ ខណៈដែលស៊ុយអែតវិញនៅតែបន្តការរង់ចាំដដែល។
សភារបស់ប្រទេសតួកគីកាលពីថ្ងៃព្រហស្បតិ៍ទី ៣០ ខែមីនាសប្តាហ៍នេះ បានអនុម័តលើច្បាប់មួយ ដើម្បីអនុញ្ញាតឱ្យប្រទេសហ្វាំងឡង់ចូលរួមជាមួយអង្គការណាតូជាសមាជិកជាផ្លូវការ ដោយជម្រះនូវមន្ទិលទាំងឡាយសម្រាប់ប្រទេសនេះ ក្នុងការក្លាយជាផ្នែកមួយនៃសម្ព័ន្ធភាពការពារលោកខាងលិច ខណៈដែលមានសង្រ្គាមកំពុងឆាបឆេះនៅអ៊ុយក្រែន។ សភាតួកគីគឺជាសមាជិកចុងក្រោយក្នុងចំណោមសមាជិកទាំង ៣០ នៃសម្ព័ន្ធភាពដែលផ្តល់សច្ចាប័នលើសមាជិកភាពរបស់ប្រទេសហ្វាំងឡង់ បន្ទាប់ពីសភារបស់ប្រទេសហុងគ្រីបានអនុម័តច្បាប់ស្រដៀងគ្នានេះកាលពីដើមសប្តាហ៍។
ប្រធានាធិបតីតួកគី លោក Tayyip Erdogan ធ្លាប់បាននិយាយកាលពីដើមខែមីនាថា ប្រទេសហ្វាំងឡង់បានធានាការប្រសិទ្ធពររបស់ប្រទេសតួកគី បន្ទាប់ពីបានចាត់វិធានការជាក់ស្តែងដើម្បីរក្សាការសន្យាក្នុងការបង្រ្កាបក្រុមដែលគេមើលឃើញដោយទីក្រុងអង់ការ៉ាថាជាភេរវករ និងរំដោះការនាំចេញផ្នែកការពារជាតិ។ ក៏ប៉ុន្តែស៊ុយអែតវិញមិនបានផ្តល់នូវការទាមទារចាប់បញ្ជូនក្រុមប្រឆាំងក្រៅប្រទេសមកឲ្យតួកគីឡើយ។
ការចូលជាសមាជិកភាពអង្គការណាតូរបស់ហ្វាំងឡង់នេះ នឹងធ្វើឲ្យសម្ព័ន្ធណាតូកើនឡើងសមាជិកថ្មីមួយទៀត ធ្វើឲ្យសម្ព័ន្ធកាន់តែមានកម្លាំងខ្លាំង ព្រមទាំងអាចការពារហ្វាំឡង់ពីការភ័យខ្លាចការគំរាមកំហែងពីរុស្ស៊ីផងដែរ៕
ប្រភព៖ REUTERS
ប្រភពរូប៖REUTERS
ប្រែសម្រួល៖សុខ តុលា
