មនុស្សយ៉ាងហោចណាស់ជិត៣០នាក់បានស្លាប់ រួមមានទាំងទារកទើបតែកើតបាន៦ខែគួរឲ្យអាណិត ក្នុងឧប្បត្តិហេតុឆេះស្រឡាងនៅប្រទេសហ្វីលីពីនសប្តាហ៍នេះ។
យោងតាមសារព័ត៌មានរ៉យទ័រ ហេតុការណ៍ឆាបឆេះស្រឡាងនេះបានកើតឡើងកាលពីអធ្រាត្រថ្ងៃពុធទី២៩ ខែមីនា ឆ្នាំ២០២៣ នៅដែនទឹកនៃកោះ Baluk-Baluk, ក្រុងHadji Muhtamad ខេត្ត Basilan ភាគខាងជើងប្រទេសហ្វីលីពីន។ មកទល់នឹងថ្ងៃព្រហស្បតិ៍ម្សិលមិញនេះ សមត្ថកិច្ចនៅមិនទាន់កំណត់ពីមូលហេតុនៃការឆេះនេះនៅឡើយទេ ។ ពេលកើតហេតុនៅលើកោះ Basilan ភាគខាងត្បូង នៅពេលដែលអ្នកដំណើរជាច្រើនបានដេកលក់នៅក្នុងកាប៊ីននៃស្រឡាង។ អភិបាលខេត្ត Hadjiman Hataman Salliman បានប្រាប់ប្រព័ន្ធផ្សព្វផ្សាយថា មនុស្ស ១១ នាក់ រួមទាំងកុមារ ៣ នាក់បានលង់ទឹកស្លាប់ បន្ទាប់ពីលោតចេញពីកប៉ាល់ដែលកំពុងឆេះ ខណៈមនុស្ស ១៨ នាក់បានស្លាប់ក្នុងអគ្គិភ័យលើស្រឡាងរួមទាំងទារកដែលទើបតែកើតបាន៦ខែ។ លោក Salliman បាននិយាយអំពីកប៉ាល់ដែលជាប់ឆ្នេរថា៖ “យើងមិនទាន់រុករកកប៉ាល់ទាំងមូលឃើញនៅឡើយទេ ព្រោះវានៅក្តៅណាស់”។
ហ្វីលីពីន ដែលជាប្រជុំកោះជាង ៧៦០០ កោះ មានកំណត់ត្រាមិនល្អសម្រាប់សុវត្ថិភាពដែនសមុទ្រ ដោយកប៉ាល់តែងតែមានមនុស្សច្រើនកកកុញ និងកប៉ាល់ចាស់ៗជាច្រើនកំពុងប្រើប្រាស់។ កាលពីខែឧសភា មនុស្សយ៉ាងហោចប្រាំពីរនាក់បានស្លាប់ក្នុងគ្រោះអគ្គិភ័យនៅលើស្រឡាងល្បឿនលឿនដែលដឹកមនុស្សចំនួន ១៣៤នាក់៕
ប្រភព៖ REUTERS
ប្រភពរូប៖REUTERS
ប្រែសម្រួល៖សុខ តុលា
