ភ្នំពេញ៖អគ្គិភ័យបានឆាបឆេះគំនរទុយោធំៗសម្រាប់បូមខ្សាច់ដាក់ទំនាបបឹង យ៉ាងសន្ធោសន្ធៅ ខណៈគេសង្ស័យថាអាចមានអ្នកលួចដុត។ហេតុការណ៍នេះបានកើតឡើងនៅដីឡូត៍មួយកន្លែង ខាងជើងផ្លូវជាតិលេខ៦អា ក្នុងភូមិចំបក់មាស សង្កាត់បាក់ខែង ខណ្ឌជ្រោយចង្វា កាលពីល្ងាចថ្ងៃទី៣០ មីនា។
![](https://cambodiaflashnews.com/wp-content/uploads/2021/06/top-banner.gif)
អ្នកឃើញហេតុការណ៍បានឱ្យដឹងថា ដំបូងមានផ្សែងហុយចេញពីគំនរទុយោធំៗនោះ។បន្ទាប់មកក៏មានភ្លើងឆេះយ៉ាងសន្ធោសន្ធៅត្រូវបានរាយការណ៍ទៅសមត្ថកិច្ចជំនាញចុះមកជួយអន្តរាគមន៍។
ក្នុងហេតុការណ៍នេះ សមត្ថកិច្ចបានចេញរថយន្តពន្លត់អគ្គិភ័យជាច្រើនគ្រឿងចុះមកជួយ បាញ់ទឹកពន្លត់។ប៉ុន្តែមិនអាចទប់ស្កាត់បានទេ ព្រោះទុយោនោះមានចំនួនច្រើនដែលគេដាក់ជាគំនរនៅលើវាលខ្សាច់ មិនអាចឱ្យរថយន្តពន្លត់អគ្គិភ័យចូលទៅបាញ់ទឹកពន្លត់បានទាន់ពេលឡើយ។
ករណីនេះគេមិនទាន់ដឹងពីមូលហេតុនៅឡើយ។តែគេដាក់ការសង្ស័យថា អាចមានអ្នកលួចដុត ឬមានជនខិលខូចបោះកន្ទុយបារីលើទុយោនោះ ទើបក្លាយជាអគ្គិភ័យឆាបឆេះបែបនេះ ៕ដោយ៖វិចិត្រ