ភ្នំពេញ៖ បុរសជនជាតិចិនម្នាក់ បានបើករថយន្ត PRADO បុកម៉ូតូបងប្អូនជិះឌុបគ្នាចេញពីសាលាបត់ឆ្លងផ្លូវ បណ្តាលឱ្យប៉ើងធ្លាក់ចូលប្រឡាយទឹកស្អុយរងរបួសធ្ងន់២នាក់។ហេតុការណ៍ខាងលើបានកើតឡើងស្ថិតនៅផ្លូវជាតិលេខ៤ ជិតផ្លូវរថភ្លើងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ កាលពីរសៀលថ្ងៃទី២៨ ខែមីនា។
សមត្ថកិច្ចបានឱ្យដឹងថា ជនរងគ្រោះ២នាក់បងប្អូនឈ្មោះ ឡុង វីរៈស័ក្ត អាយុ១៥ឆ្នាំសិស្សសាលាជម្ពូវ័នបាក់ជើងឆ្វេងរងរបួសធ្ងន់និងឈ្មោះឡូញ ចាវ អាយុ២៣ឆ្នាំ ជាងដែកត្រូវជាបង។ពួកគេនៅភូមិផ្សារកំបូល សង្កាត់/ខណ្ឌកំបូល។
មុនកើតហេតុ ជនរងគ្រោះ២នាក់ជិះម៉ូតូហុងដាឌ្រីមចេញពីសាលារៀនទៅផ្ទះ តាមផ្លូវជាតិលេខ៤ពីកើតទៅលិច។មកដល់កន្លែងខាងលើស្រាប់តែរថយន្តម៉ាកPRADO ផ្លាកលេខភ្នំពេញ2H-8818 បើកពីលិចទៅកើតបានបត់ឆ្លងផ្លូវទៅបុកម៉ូតូប៉ើងធ្លាក់ចូលក្នុងប្រឡាយទឹកស្អុយ បណ្តាលឱ្យរងរបួសធ្ងន់២នាក់។
ក្រោយមកជនរងគ្រោះត្រូវបានក្រុមគ្រួសារដឹកទៅមន្ទីរពេទ្យ។ចំណែករថយន្ត-ម៉ូតូនិងបុរសចិនជាអ្នកបើកបរត្រូវសមត្ថកិច្ចយកទៅផ្នែកជំនាញ នៃអធិការដ្ឋាននគរបាលខណ្ឌដើម្បីដោះស្រាយពេលក្រោយ៕ដោយ៖វិចិត្រ
