ផ្ទុះបាតុកម្មចលាចលខ្លាំងនៅផ្នែកខ្លះនៃប្រទេសអ៊ីស្រាអែលកាលពីថ្ងៃអាទិត្យទី ២៦ ខែមីនា ឆ្នាំ២០២៣ បន្ទាប់ពីនាយករដ្ឋមន្រ្តី Benjamin Netanyahu បានបណ្តេញរដ្ឋមន្ត្រីការពារជាតិរបស់គាត់ពីតំណែង។
ការបណ្តេញលោករដ្ឋមន្រ្តីការពារជាតិ Yoav Gallant ប្រកាសនៅក្នុងសេចក្តីថ្លែងការណ៍មួយដោយការិយាល័យនាយករដ្ឋមន្ត្រីក្នុងការប៉ុនប៉ងរបស់រដ្ឋាភិបាល បានធ្វើឱ្យមានបាតុកម្មដ៏ចលាចលនៅយប់ថ្ងៃអាទិត្យ នៅក្នុងនិងជុំវិញទីក្រុង Tel Aviv ជាទីដែលក្រុមបាតុករបានបិទផ្លូវហាយវេច្រើនខ្សែ និងបានដុតបំផ្លាញផ្លូវធំៗចំនួនពីរ និងនៅក្នុងទីក្រុង Jerusalem ជាកន្លែងដែលហ្វូងមនុស្សបានទម្លុះរបាំងប៉ូលិសនៅខាងក្រៅគេហដ្ឋានឯកជនរបស់លោកនាយករដ្ឋមន្រ្តី Netanyahu។ បាតុកម្មត្រូវបានគេគ្រោងថានឹងបន្តនៅថ្ងៃចន្ទនេះបន្ថែមទៀត។
ការបណ្តេញចេញពីតំណែង បានកើតឡើងបន្ទាប់ពីលោករដ្ឋមន្រ្តីការពារជាតិរូបនេះបានជំរុញបដិសេធនឹងរដ្ឋាភិបាលដែលចង់រុះរើប្រព័ន្ធតុលាការកំពូលរបស់ប្រទេសកាលពីយប់ថ្ងៃសៅរ៍។ លោក Gallant បានជំរុញថា ច្បាប់របស់តុលាការត្រូវតែពន្យារពេល កុំទាន់អាលរុះរើ។ លោកក៏ព្រមានពីភាពចលាចលក្នុងវិស័យយោធា មានការគំរាមកំហែងដល់សន្តិសុខរបស់អ៊ីស្រាអែលដែរ។ លោក Gallant បាននិយាយនៅក្នុងសុន្ទរកថាតាមទូរទស្សន៍មួយថ្ងៃមុនពេលគាត់ត្រូវបានបណ្តេញចេញថា “ភាពប្រេះឆានៅក្នុងសង្គមរបស់យើងកំពុងពង្រីក និងជ្រៀតចូលកងកម្លាំងការពារអ៊ីស្រាអែល”។ លោកបាននិយាយថា ការខ្វែងគំនិតគ្នាបានបណ្តាលឲ្យមាន “គ្រោះថ្នាក់ច្បាស់លាស់ និងភ្លាមៗ និងជាក់ស្តែងចំពោះសន្តិសុខរបស់រដ្ឋ ខ្ញុំនឹងមិនចូលជាភាគីចំពោះរឿងនេះទេ”៕
ប្រភព៖REUTERS
ប្រភពរូប៖REUTERS
ប្រែសម្រួល៖សុខ តុលា
