កែប៖មន្ត្រីសាលាឃុំម្នាក់បានបើករថយន្តបុកបង្កាន់ដៃស្ពានក្រឡាប់បណ្តាលឱ្យស្លាប់ភ្លាម ។ហេតុការណ៍នេះបានកើតឡើងនៅលើផ្លូវប្របមាត់សមុទ្រ ក្រុងកែប កាលពីយប់ថ្ងៃទី២៦ ខែមីនា។
មន្ត្រីនគរបាលចរាចរណ៍ស្រុកដំណាក់ចង្អើរបានឱ្យដឹងថា ជនរងគ្រោះបាត់បង់ជីវិតឈ្មោះ ពោញ សំបូរ អាយុ៤២ឆ្នាំ ជាជំនួយការស្មៀនសាលាឃុំអង្កោល នៅភូមិទួលសាង៉ាំ ឃុំអង្កោល ស្រុកដំណាក់ចង្អើរ ខេត្តកែប។
ប្រភពដដែលបានបន្តថា កាលពីម៉ោងជិត១០យប់ ថ្ងៃទី២៦ ខែមីនា មានគ្រោះថ្នាក់ចរាចរមួយបានកើតឡើង ដោយរថយន្តបើកបុកបង្កាន់ដៃស្ពានក្រឡាប់ខ្លួនឯង បណ្តាលឱ្យអ្នកបើកបរស្លាប់ភ្លាមៗតែម្តង។
ក្រោយកើតហេតុ រថយន្តសង្គ្រោះបានដឹកសពទៅលំនៅប្រគល់ជូនសាច់ញាតិរៀបចំធ្វើបុណ្យជាមួយរថយន្តដែលរងការខូចខាតនោះផងដែរដើម្បីយកទៅជួសជុល៕ដោយ៖កំចាយ
