ស្ទឹងត្រែង៖កម្លាំងចម្រុះបានចាប់ជនជាតិឡាវ២នាក់ ជាមួយវត្ថុតាងគ្រឿងញៀនចំនួន១៣ កញ្ចប់ធំទម្ងន់សរុប១២គីឡូ៧៤៥ក្រាម។
ករណីចាប់ក្រុមឧក្រិដ្ឋគ្រឿងញៀននេះនៅម្តុំស្ពានទី២ ភូមិអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែងកាលពីព្រឹកថ្ងៃទី២៧ ខែមីនា។
មន្ត្រីក្នុងប្រតិបត្តិការបានឱ្យដឹងថា ជនសង្ស័យជនជាតិឡាវ២នាក់ បានបើករថយន្តផ្លាកលេខឡាវឆ្លងកាត់ច្រករបៀងចូលមកទឹកដីខេត្តស្ទឹងត្រែងកម្ពុជា។ បន្ទាប់ពីឃើញរថយន្តឡាវនោះភ្លាម កម្លាំងនគរបាលប្រចាំច្រកទ្វារអន្តរជាតិត្រពាំងក្រៀល បានឃាត់សាកសួរនិងត្រួតពិនិត្យលិខិតឆ្លងដែន។
ពេលពិនិត្យក្នុងរថយន្ត ឃើញមានធុងពណ៌បៃតងដាក់កាកស្ករមួយកំណាត់លើនិងបិទសន្ទះ ២ដើម្បីបំភាន់ភ្នែក។ដោយសង្ស័យជាបទល្មើសគ្រឿងញៀនក៏សម្រេចកាត់ធុងជ័រចេញស្រាប់តែឃើញកញ្ចប់គ្រឿងញៀនបង្កប់ជាមួយដីខ្សាច់។
ពេលឃើញគ្រឿងញៀនក្រុមសមត្ថកិច្ចបានចាប់ឡាវទាំង២នាក់នោះ និងដករហូតរថយន្ត១គ្រឿងជាមួយគ្រឿងញៀន១៣កញ្ចប់ធំទម្ងន់ប្រមាណ១៣គីឡូក្រាម។ជនសង្ស័យឈ្មោះកែវ គង់មឿង អាយុ២៣ឆ្នាំ នៅភូមិចមកែវ ស្រុកកៃសន ខេត្តសុវណ្ណ។ឈ្មោះណុកសុវណ្ណសាម អាយុ២០ឆ្នាំ នៅភូមិណាសៃ រាជធានីវៀងចន្ទន៍ ប្រទេសឡាវ។
បន្ទាប់មកផ្នែកជំនាញបានបញ្ជូនជនល្មើសជាមួយវត្ថុតាងគ្រឿងញៀនទៅស្នងការដ្ឋាននគរបាលខេត្តស្ទឹងត្រែងដើម្បីបន្តនីតិវិធី៕ដោយ៖សុខុម
