ប្រទេសបារាំងយកទាហានអ៊ុយក្រែន៣០នាក់ ទៅបង្វឹករយៈពេល១ខែកន្លះលើយន្តហោះចម្បាំង Mirage 2000 បើទោះបីជាមិនទាន់មានសេចក្តីសម្រេចថានឹងបញ្ជូនយន្តហោះចម្បាំងទៅអ៊ុយក្រែនជាលក្ខណៈផ្លូវការក៏ដោយ។
យោងតាមកាសែតបារាំង Le Figaro បានឲ្យដឹងថា អាកាសយានិកអ៊ុយក្រែនប្រហែលសាមសិបនាក់ បាននិងកំពុងទទួលការហ្វឹកហ្វឺនបង្កើនល្បឿនលើយន្តហោះចម្បាំងទម្លាក់គ្រាប់បែកបារាំងស៊េរី Mirage 2000 នៅមូលដ្ឋានទ័ពអាកាស Mont-de-Marsan និង Nancy ក្នុងរយៈពេលសរុបជាងមួយខែកន្លះ។ ការសម្រេចចិត្តបណ្ដុះបណ្ដាលអាកាសយានិកត្រូវបានធ្វើឡើងតាំងពីនៅមុនពេលដំណើរទស្សនកិច្ចរបស់ប្រធានាធិបតី Volodymyr Zelenskyy ទៅទីក្រុងប៉ារីសកាលពីថ្ងៃទី ៨ ខែកុម្ភៈ ឆ្នាំ២០២៣ម្ល៉េះ។
នៅដើមខែមីនានេះ រដ្ឋមន្ត្រីការពារជាតិបារាំង លោក Sébastien Lecornu បាននិយាយនៅក្នុងការសន្ទនាជាមួយសមាជិកព្រឹទ្ធសភាថា ប្រទេសបារាំងមិនទាន់បានធ្វើការសម្រេចចិត្តណាមួយលើយន្តហោះសម្រាប់អ៊ុយក្រែន ឬការហ្វឹកហ្វឺនអ្នកបើកបរទេ ប៉ុន្តែបានទទួលស្គាល់ថាប្រធានបទនេះកំពុងត្រូវបានពិភាក្សាបណ្តើរៗ។ កងទ័ពអាកាសបារាំងឥឡូវនេះមានយន្តហោះចម្បាំងសរុបចំនួន ១៩៥ គ្រឿង: ៩៦គ្រឿងជាប្រភេទ Rafale, ៩៩គ្រឿងជាប្រភេទ Mirage 2000 និងស៊េរីផ្សេងៗទៀត ខណៈយន្តហោះ ៤០គ្រឿង កំពុងដាក់បម្រើការជាមួយកងនាវាចរ៕
ប្រភព៖REUTERS
ប្រភពរូប៖REUTERS
ប្រែសម្រួល៖សុខ តុលា
