ភ្នំពេញ៖សមត្ថកិច្ចកំពុងរកចាប់តៃកុងរថយន្តរត់តាក់ស៊ីបន្ទាប់ពីដាក់ភ្ញៀវរួច បើកថយក្រោយបន្តិចកិនក្មេងស្រីអាយុ១៧ខែ បណ្ដាលឱ្យស្លាប់ពេលបញ្ជូនទៅដល់មន្ទីរពេទ្យ។ហេតុការណ៍ដ៏អកុសលនេះបានកើតឡើងនៅភូមិសំបួរ សង្កាត់ដង្កោ ខណ្ឌដង្កោ កាលពីល្ងាចថ្ងៃទី២០ ខែមីនា។
![](https://cambodiaflashnews.com/wp-content/uploads/2021/06/top-banner.gif)
មន្ត្រីនគរបាលប៉ុស្តិ៍បានឱ្យដឹងថា ក្មេងស្រីរងគ្រោះឈ្មោះ សុក្រ ឆាតជេនណា អាយុ១៧ខែ។ ចំណែកអ្នកបើកបររថយន្តបង្កឈ្មោះ សាង កុសល អាយុ៣២ឆ្នាំ នៅភូមិសន្លូងលាប ឃុំព្រៃគ្នេស ស្រុកមេសាង ខេត្តព្រៃវែង។
មុនកើតហេតុ ម្តាយធំក្មេងស្រីរងគ្រោះស្នាក់នៅផ្ទះជាប់គ្នាបានហៅរថយន្តឈ្នួលជាអ្នកនៅស្រុកជាមួយគ្នាឱ្យមកយកភ្ញៀវទៅលេងស្រុក។នៅពេលភ្ញៀវឡើងជិះរថយន្តអស់ហើយ ខណៈក្មេងស្រីកំពុងដើរលេងនៅមុខផ្ទះ តៃកុងបានឡើងបើករថយន្តថយក្រោយបន្តិចស្រាប់តែកិនក្មេងស្រីនោះបណ្ដាលឱ្យស្លាប់ពេលបញ្ជូនទៅមន្ទីរពេទ្យកុមារជាតិ។ចំណែកអ្នកបើកបររថយន្តដោយឃើញសភាពការណ៍មិនស្រួលក៏រត់គេចខ្លួនបាត់។
ក្រោយកើតហេតុ កម្លាំងសមត្ថកិច្ចបានចុះយករថយន្តបង្កទៅទុកនៅអធិការដ្ឋាននគរបាលខណ្ឌដង្កោ និងសហការតាមរកចាប់អ្នកបើកបររថយន្តនោះមកទទួលខុសត្រូវក្នុងករណីនេះ៕ដោយ៖វិចិត្រ