ប្រជាជនកូរ៉េខាងជើងជិត៨០ម៉ឺននាក់ បាននាំគ្នាស្ម័គ្រចិត្តចុះឈ្មោះចូលជួរយោធាត្រៀមធ្វើសឹកសង្រ្គាមជាមួយសហរដ្ឋអាម៉េរិក។
![](https://cambodiaflashnews.com/wp-content/uploads/2021/06/top-banner.gif)
នេះបើតាមកាសែតជាតិ Rodong Sinmun បានរាយការណ៍កាលពីចុងសប្តាហ៍ថ្មីៗនេះ។ ក្នុងនោះបាននិយាយថា និស្សិត និងកម្មករប្រហែល ៨០០.០០០ នាក់ ត្រឹមតែថ្ងៃសុក្រទី ១៧ ខែមីនាមួយថ្ងៃប៉ុណ្ណោះនៅទូទាំងប្រទេសបានបង្ហាញពីបំណងចង់ចុះឈ្មោះ ឬចុះឈ្មោះក្នុងជួរយោធាឡើងវិញយ៉ាងច្រើនសម្បើមដើម្បីប្រឆាំងនឹងសហរដ្ឋអាម៉េរិក។ កាសែតបន្តថា “ការសាទរយ៉ាងខ្លាំងរបស់យុវជនក្នុងការចូលបម្រើកងទ័ព គឺជាការបង្ហាញនូវឆន្ទៈដ៏មោះមុតរបស់យុវជនជំនាន់ក្រោយ ដើម្បីលុបបំបាត់ភាពមមាញឹកសង្គ្រាមដោយឥតមេត្តា ដែលខិតខំប្រឹងប្រែងចុងក្រោយដើម្បីលុបបំបាត់ប្រទេសសង្គមនិយមដ៏មានតម្លៃរបស់យើង និងសម្រេចបាននូវបុព្វហេតុដ៏ធំនៃការបង្រួបបង្រួមជាតិ។
ការអះអាងរបស់កូរ៉េខាងជើងបានធ្វើឡើងបន្ទាប់ពីកូរ៉េខាងជើងកាលពីថ្ងៃព្រហស្បតិ៍បានបាញ់បង្ហោះមីស៊ីលផ្លោងអន្តរទ្វីប Hwasong-17 (ICBM) ក្នុងការឆ្លើយតបទៅនឹងសមយុទ្ធយោធាអាម៉េរិក-កូរ៉េខាងត្បូងដែលកំពុងបន្តលើឧបទ្វីបកូរ៉េ។ ហើយនៅថ្ងៃចន្ទសប្តាហ៍នេះ មេដឹកនាំកូរ៉េខាងជើងគីមជុងអ៊ុនក៏បានប្រកាសរៀបចំអាវុធនុយក្លេអ៊ែរដើម្បីត្រៀមវាយប្រហារសហរដ្ឋអាម៉េរិក និងកូរ៉េខាងត្បូងផងដែរ៕
ប្រភព៖REUTERS
ប្រភពរូប៖REUTERS
ប្រែសម្រួល៖សុខ តុលា