ប្រទេសអូស្រ្តាលីនឹងទិញកាំជ្រួចTomahawk២២០ដើម តម្លៃរាប់រយលានដុល្លារពីអាម៉េរិក បន្ទាប់ពីប្រទេសនេះទើបតែបានប្រកាសទិញនាវាមុជទឹកដើរដោយថាមពលនុយក្លេអ៊ែរថ្មីៗប៉ុណ្ណោះ។
យោងតាមសេចក្តីថ្លែងការណ៍ក្រសួងការពារជាតិអាម៉េរិក និងអូស្រ្តាលី កិច្ចព្រមព្រៀងនេះត្រូវបានយល់ព្រម ហើយនឹងត្រៀមលក់ចេញនូវកាំជ្រួច Tomahawk ២២០ដើមក្នុងរង្វង់ទឹកប្រាក់ប្រមាណ ៨៩៤លានដុល្លារអាម៉េរិក។ កាំជ្រួចឆ្លងទ្វីបនេះនឹងយកទៅ បំពាក់ប្រើជាមួយនាវាមុជទឹកដើរដោយថាមពលនុយក្លេអ៊ែរ ដែលអូស្ត្រាលីទើបតែបានប្រកាសទិញ៣គ្រឿងពីអាម៉េរិកនាពេលថ្មីៗនេះ។ រដ្ឋមន្ត្រីការពារជាតិអូស្ត្រាលី Richard Marles បាននិយាយថា អូស្ត្រាលីត្រូវការមីស៊ីលរយៈចម្ងាយឆ្ងាយ។ Marles បានប្រាប់ Channel Nine របស់អូស្ត្រាលីថា “ការធ្វើឱ្យប្រាកដថាយើងមានកាំជ្រួចវាយប្រហារចម្ងាយឆ្ងាយ គឺជាសមត្ថភាពដ៏សំខាន់សម្រាប់ប្រទេស”។ “វាអាចឲ្យយើងអាចឈានទៅដល់ហួសច្រាំងសមុទ្ររបស់យើងបន្ថែមទៀត ហើយនោះជាវិធីដែលយើងអាចរក្សាសុវត្ថិភាពអូស្ត្រាលី”។
លោក Pat Conroy រដ្ឋមន្ត្រីក្រសួងឧស្សាហកម្មការពារជាតិ ការអភិវឌ្ឍអន្តរជាតិ និងប៉ាស៊ីហ្វិករបស់ប្រទេសអូស្ត្រាលី បាននិយាយថា កាំជ្រួចអាចត្រូវបានបាញ់ចេញពីនាវាមុជទឹកថ្នាក់ Virginia ដែលអូស្ត្រាលីបានប្រកាសថាខ្លួននឹងទិញពីសហរដ្ឋអាម៉េរិក៕
ប្រភព៖ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
