កំពង់ស្ពឺ៖បុរសម្នាក់បញ្ជាលើកដងបំពង់បាញ់ចំណីសត្វលើរថយន្ត បានប៉ះជាមួយខែ្សភ្លើងអត់ស្រោបដែលមានតង់ស្យុងខ្ពស់បណ្តាលឱ្យឆក់ស្លាប់ភ្លាមៗ។ ហេតុការណ៍នេះបានកើតឡើងនៅក្បែរស្ពានអូរក្រាំងអំបិល តាមផ្លូវជាតិលេខ៤ ស្ថិតក្នុងភូមិស្លា ឃុំវល្លិស ស្រុកសំរោងទង ខេត្តកំពង់ស្ពឺ កាលពីថ្ងៃទី១៦ ខែមីនា។
លោកវរសេនីយ៍ឯក ឃុត សុផល អធិការនគរបាលស្រុកសំរោងទងបានឱ្យដឹងថា ជនរងគ្រោះបាត់បង់ជីវិតឈ្មោះ អ៊ុន សំអន អាយុ៣៤ឆ្នាំ អ្នកបើករថយន្តដឹកចំណីសត្វ រស់នៅភូមិចម្ការគ ស្រុកស្វាយចេក ខេត្តបន្ទាយមានជ័យ។
មុនកើតហេតុ ជនរងគ្រោះបានបើករថយន្តម៉ាកហ៊ីយ៉ាន់ដាយ ផ្លាកលេខភ្នំពេញ3F-6101ដឹកស៊ីទែនចំណីសត្វ។មកដល់កន្លែងខាងលើស្រាប់តែរថយន្តបានបែកកង់ ហើយក៏អែបចិញ្ចើមផ្លូវដើម្បីដោះដូរកង់។ពេលនោះជនរងគ្រោះបានបញ្ជាដងបំពង់បាញ់ចំណីសត្វក៏ប៉ះខ្សែភ្លើងអត់ស្រោបដែលមានតង់ស្យុងខ្ពស់បណ្ដាលឱ្យឆ្លងចរន្ដអគ្គិសនីឆក់ស្លាប់ភ្លាមៗតែម្ដង៕ដោយ៖វិចិត្រ
