ភ្នំពេញ៖អគ្គិភ័យបានឆាបឆេះឃ្លាំងស្តុកគ្រឿងបន្លាស់រថយន្តមួយកន្លែង យ៉ាងសន្ធោសន្ធៅបង្កឱ្យខូចខាតសម្ភារជាច្រើន ខណៈសមត្ថកិច្ចកំពុងស្រាវជ្រាវរកមូលហេតុ។
ប្រភពព័ត៌មានបានឱ្យដឹងថា អគ្គិភ័យបានឆាបឆេះឃ្លាំងស្តុកគ្រឿងបន្លាស់រថយន្តមួយកន្លែង នៅតាមផ្លូវម៉ុងឫទ្ធី ស្ថិតក្នុងភូមិបាយ៉ាប សង្កាត់ភ្នំពេញថ្មី ខណ្ឌសែនសុខ កាលពីម៉ោង១០ព្រឹកថ្ងៃទី១៧ មីនាឆ្នាំ២០២៣។
អគ្គិភ័យនេះបានចាប់ផ្តើមឆេះយ៉ាងសន្ធោសន្ធៅ និងបង្កការភ្ញាក់ផ្អើលយ៉ាងខ្លាំងត្រូវបានកម្លាំងអាជ្ញាធរចេញរថយន្តពន្លត់អគ្គិភ័យជាច្រើនគ្រឿងចុះជួយអន្តរាគមន៍បាញ់ទឹកពន្លត់ ។តែប៉ុន្មានម៉ោងក្រោយមកភ្លើងមិនទាន់រលត់នៅឡើយដោយសារគ្រឿងបន្លាស់រថយន្តភាគច្រើនជាគ្រឿងជ័រ។
គ្រោះអគ្គិភ័យនេះមិនបានឆេះរាលដាលដល់ផ្ទះអ្នកជិតខាងនិងមិនមានគ្រោះថ្នាក់ដល់មនុស្សទេ ព្រោះឃ្លាំងខាងលើស្ថិតក្នុងដីឡូត៍មួយកន្លែង នៅដាច់ដោយឡែកពីផ្ទះប្រជាពលរដ្ឋ។ក្នុងហេតុការណ៍ឆេះឃ្លាំងស្តុកគ្រឿងបន្លាស់រថយន្តនេះ មន្ត្រីអាជ្ញាធរមិនទាន់ដឹងពីមូលហេតុជាមួយទំហំនៃការខូចខាតនៅឡើយដោយសមត្ថកិច្ចកំពុងសាកសួរ៕ដោយ៖វិចិត្រ
