ភ្នំពេញ៖ លោក ឈួន ដារ៉ា រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការ ក្រសួងពាណិជ្ជកម្ម បានប្តេជ្ញាថាៈ នៅឆ្នាំ២០២៣នេះ នឹងជំរុញទំហំពាណិជ្ជកម្មទ្វេភាគី កម្ពុជា-ចិន ឱ្យកើនឡើងលើស ១២ ពាន់លាន ដុល្លារអាម៉េរិក ។
នៅក្នុងវេទិកាផ្សព្វផ្សាយ ពិព័រណ៍ចិន-អាស៊ានលើកទី២០ ឆ្នាំ២០២៣ កាលពីថ្ងៃទី១៥ ខែមីនាលោករដ្ឋលេខាធិការ បានមាន ប្រសាសន៍ ថា៖ រដ្ឋាភិបាលនៃប្រទេស យើងទាំងពីរ បានធ្វើកិច្ចសហប្រតិបត្តិការ និងអភិវឌ្ឍន៍រួមគ្នា លើវិស័យសំខាន់ៗ ដូចជា វិស័យហេដ្ឋារចនា សម្ព័ន្ធ កសិកម្ម ការកសាងសមត្ថភាព តំបន់សេដ្ឋកិច្ចពិសេស វប្បធម៌ និងទេសចរណ៍ ហិរញ្ញវត្ថុ និងការការពារអេកូបរិស្ថាន ហើយថ្មីៗនេះ កម្ពុជា-ចិនបានចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគី ដែលធ្វើឱ្យទំហំពាណិជ្ជកម្ម រវាងប្រទេសយើងទាំងពីរ កាន់ តែរីកចម្រើនមួយកម្រិតទៀត។ដោយឡែក ទោះស្ថិតក្នុងគ្រាលំបាកដែលបណ្តាលមកពីការកើតឡើង នូវជំងឺកូវីដ-១៩ ក្តី ក្នុងឆ្នាំ២០២២ កន្លងទៅថ្មីៗនេះ ចិន បានដាក់ទុន វិនិយោគនៅកម្ពុជា មានចំនួន ១៨៦ គម្រោង គិតជាទឹកប្រាក់សរុបចំនួន ប្រមាណ ៤.០០០ លានដុល្លារអាមេរិក.
សូមបញ្ជាក់ថាគិតត្រឹមដំណាច់ ឆ្នាំ២០២២ ទំហំពាណិជ្ជកម្មកម្ពុជា-ចិន សម្រេចបានជាង ១១.៦៨៦ លានដុល្លារអាម៉េរិក មានការកើន ឡើងប្រមាណ ៥%បើធៀបទៅនឹងរយៈពេលដូចគ្នា ក្នុងឆ្នាំ២០២១។ ក្នុងនោះ ការនាំចេញពីកម្ពុជាទៅចិន មានដូចជា អង្ករ, ចេក, ស្វាយ , មៀនស្រស់,សម្លៀកបំពាក់,គ្រឿងស្ពាន់និងបន្ទះសៀគ្វីបោះពុម្ពតម្លើងរួចជាដើម។ដោយឡែកការនាំចូលពីចិនមកកម្ពុជាវិញមានដូចជា ក្រណាត់ចាក់, គ្រឿងចក្រ, ក្រណាត់ត្បាញពីកប្បាស, ក្រដាសនិងក្រដាសកាតុង, ម៉ាស៊ីនអេឡិចត្រូនិក, គ្រឿងបន្លាស់ទោចក្រយានយន្ត, រថយន្ត និងអំពូលអគ្គិសនី ជាដើម ៕ដោយ៖សិរីមតី