ភ្នំពេញ៖អគ្គិភ័យបានឆេះផ្ទះចំនួន៥ខ្នងជាមួយទ្រព្យសម្បតិ្តអស់ទាំងស្រុង និង២ខ្នងទៀតបានខូចខាតមួយចំនួនធំ ត្រូវបានផ្នែកជំនាញបង្ការសង្គ្រោះអគ្គិភ័យចុះជួយអន្តរាគមន៍បន្ទាន់គ្រោះអគ្គិភ័យនោះបានកើតឡើងនៅភូមិឫស្សី សង្កាត់ស្ទឹងមានជ័យទី២ ខណ្ឌមានជ័យ កាលពីយប់ថ្ងៃទី១៤ ខែមីនា។
ពលរដ្ឋឃើញហេតុការណ៍បានឱ្យដឹងថា ដំបូងគេឮសំឡេងផ្ទុះចេញពីម្តុំផ្ទះដែលត្រូវភ្លើងឆេះ។ករណីនេះអ្នកខ្លះថាអាចមកពីឆ្លងចរន្តអគ្គិសនី ខ្លះទៀតថាមកពីផ្ទុះកំប៉ុងហ្គាស ។ក្រោយមកភ្លើងក៏បានឆាបឆេះសន្ធោសន្ធៅឡើងតែម្តង។
ភ្លាមនោះសមត្ថកិច្ចមូលដ្ឋានបានចេញរថយន្តជាច្រើនគ្រឿងជួយអន្តរាគមន៍បាញ់ទឹកពន្លត់ អគ្គិភ័យត្រូវបានរលត់ទាំងស្រុងនៅយប់ថ្ងៃដដែល។ អគ្គិភ័យនេះមិនបណ្ដាលឱ្យមនុស្សរងគ្រោះថ្នាក់នោះទេ ដោយបង្កឱ្យខូចខាតផ្ទះថ្មប្រក់ស័ង្កសីអស់១ខ្នង-ផ្ទះឈើលើថ្មក្រោមចំនួន៤ខ្នងផ្ទះ និងទ្រព្យសម្បត្តិអស់ទាំងស្រុង។
ក្នុងនោះភ្លើងបានឆេះរាលដាលដល់ផ្ទះ២ខ្នងទៀតអស់មួយចំនួនធំ។ក្នុងហេតុការណ៍នោះសមត្ថកិច្ចបានចេញរថយន្តពន្លត់អគ្គិភ័យចំនួន១៥គ្រឿងប្រើប្រាស់ទឹកអស់ចំនួន៤៥រថយន្ត៕ដោយ៖វិចិត្រ
