បាត់ដំបង៖បុរសម្នាក់ត្រូវបានអ្នកភូមិប្រទះឃើញស្លាប់នៅតាមដងផ្លូវ ដោយគេមិនទាន់ស្គាល់អត្តសញ្ញាណនៅឡើយ។
មន្ត្រីនគរបាលបានឱ្យដឹងថា ប្រជាពលរដ្ឋបានប្រទះឃើញសាកសពបង្កការភ្ញាក់ផ្អើល នៅក្នុងភូមិដង្កោក្រម៉ាង ឃុំអំពិលប្រាំ ស្រុកបវេល ខេត្តបាត់ដំបង កាលពីរសៀលថ្ងៃទី១៣ ខែមីនា។សាកសពមិនមានអ្នកភូមិណាបានស្គាល់អត្តសញ្ញាណនៅឡើយ មានភិនភាគវ័យប្រហាក់ប្រហែលជាង៣០ឆ្នាំ ពាក់អាវដៃវែងពណ៌ខ្មៅ និងស្លៀកខោខូវប៊យពណ៌ទឹកប៊ិក។
ពលរដ្ឋនៅក្បែរទីតាំងនោះបានឱ្យដឹងថា មុនកើតហេតុមួយថ្ងៃ គេបានឃើញជនរងគ្រោះដើរពីកើតទៅលិចក្នុងសភាពស្រវឹង។ប៉ុន្តែមិនបានដឹងថាគាត់ធ្វើដំណើរទៅណាមកណាទេ រហូតដល់រសៀលថ្ងៃទី១៣មីនា អ្នកភូមិបានប្រទះឃើញបុរសរូបនោះស្លាប់នៅក្បែរចិញ្ចើមផ្លូវតែម្តង។
តាមការត្រួតពិនិត្យពីផ្នែកជំនាញនិងគ្រូពេទ្យបានសន្និដ្ឋានថា ករណីបុរសស្លាប់ខាងលើអាចបណ្តាលមកពីដាច់អាហារ ឬគាំងបេះដូង។ ភ្លាមនោះមន្ត្រីអាជ្ញាធរបានបញ្ជូនសាកសពទៅទុកនៅវត្តអំពិលប្រាំដើម ដើម្បីរង់ចាំក្រុមគ្រួសារមកទទួលយកទៅធ្វើបុណ្យ៕ដោយ៖ព្រះអង្គខ្មៅ
