ជាថ្មីម្តងទៀត កូរ៉េខាងជើងនៅថ្ងៃអង្គារទី ១៤ ខែមីនានេះ ត្រូវបានគេរាយការណ៍មកថា បានបាញ់មីស៊ីលរយៈចម្ងាយខ្លី២គ្រាប់ទៀតចូលទៅកាន់សមុទ្រ ខណៈជាការកំញើញលើកទី ២ដាក់អាម៉េរិក និងកូរ៉េខាងត្បូងក្នុងសមយុទ្ធទ្រង់ទ្រាយធំ។
នាយសេនាធិការចម្រុះកូរ៉េខាងត្បូង (JCS) បាននិយាយថា មីស៊ីលពីរគ្រាប់ថ្មីត្រូវបានបាញ់នៅម៉ោងប្រហែល ៧ និង៤០នាទីព្រឹកម៉ោងក្នុងស្រុក ថ្ងៃអង្គារទី ១៤ ខែមីនា ឆ្នាំ២០២៣ ចេញពីខេត្ត South Hwanghae ជិតឆ្នេរសមុទ្រភាគខាងលិច ដោយបានហោះប្រហែល ៦២០គីឡូម៉ែត្រ។
JCS បាននិយាយនៅក្នុងសេចក្តីថ្លែងការណ៍មួយថា យោធាកូរ៉េខាងត្បូងបានស្ថិតក្នុងការប្រុងប្រយ័ត្នខ្ពស់ និងរក្សាជំហរត្រៀមខ្លួនពេញលេញក្នុងការសម្របសម្រួលយ៉ាងជិតស្និទ្ធជាមួយសហរដ្ឋអាម៉េរិក។ នាយករដ្ឋមន្ត្រីជប៉ុន លោក Fumio Kishida ក៏បាននិយាយដែរថា ប្រទេសជប៉ុនកំពុងប្រមូលព័ត៌មានអំពីមីស៊ីលនេះ ខណៈមិនមានការខូចខាតណាមួយនៅក្នុងប្រទេសពាក់ព័ន្ធត្រូវបានរាយការណ៍នោះទេ។ បើតាមប្រធានខុទ្ទកាល័យជប៉ុន លោក Hirokazu Matsuno កាំជ្រួចទាំងនោះមិនត្រូវបានគេបញ្ជាក់ថាបានហោះចូលក្នុងទឹកដីរបស់ជប៉ុន ឬតំបន់សេដ្ឋកិច្ចផ្តាច់មុខជប៉ុននោះទេ។
ការបាញ់ថ្ងៃអង្គារនេះ បានក្លាយជាការបាញ់លើកទី២ហើយបន្ទាប់ពីការបាញ់មីស៊ីលចេញពីនាវាមុជទឹកកាលពីថ្ងៃអាទិត្យ ខណៈពេលដែលសមយុទ្ធ FREEDOM SHEILD របស់អាម៉េរិកនិងកូរ៉េខាងត្បូងកំពុងធ្វើឡើងទ្រង់ទ្រាយធំនៅឧបទ្វីបកូរ៉េ៕
ប្រភព៖ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
