ភ្នំពេញ៖ជនសង្ស័យធ្វើសកម្មភាពលួចម៉ូតូពេលយប់បានសម្រេច លុះព្រឹកឡើងពួកគេនាំគ្នាដោះបំបែកគ្រឿងចេញពីតួ ត្រូវសមត្ថកិច្ចក្របួចបាន៣នាក់និងបញ្ជូនទៅតុលាការ។
សមត្ថកិច្ចបានឱ្យដឹងថា នៅបន្ទប់ជួលក្នុងភូមិជ្រៃកោង សង្កាត់ចោមចៅ២ ខណ្ឌពោធិ៍សែនជ័យ មានករណីចោរលួចម៉ូតូមួយគ្រឿងយកទៅបាត់ កាលពីរំលងអធ្រាត្រចូលថ្ងៃទី១២ ខែមីនា។ក្រោយពីមានចោរលួចម៉ូតូរួច ព្រឹកថ្ងៃដដែលកម្លាំងនគរបាលជំនាញខណ្ឌខណ្ឌពោធិ៍សែនជ័យក៏ស្រាវជ្រាវតាមចាប់ក្រុមចោរបាន៣នាក់។
ជនសង្ស័យទាំង៣នាក់-ឈ្មោះ ឈិន ណុប អាយុ២៣ឆ្នាំ-ឈ្មោះ វ៉ាន់ថា បញ្ញា អាយុ២២ឆ្នាំ -និងឈ្មោះលី ទី អាយុ២៣ឆ្នាំ។ពួកគេស្នាក់នៅបន្ទប់ជួលខណ្ឌពោធិ៍សែនជ័យ កន្លែងកំណើត ភូមិកំពង់ត្របែក ស្រុកកំពង់ត្របែក ខេត្តព្រៃវែង។ ចំណែកម្ចាស់ម៉ូតូឈ្មោះ សូត្រ រតនា អាយុ២០ឆ្នាំ ជាបុគ្គលិកហាង KTV ស្នាក់នៅបន្ទប់ជួលខាងលើ។
ម៉ូតូដែលជនសង្ស័យលួចយកម៉ាកនិច ផ្លាកលេខកំពង់ធំ1O-3013 ត្រូវបានជនសង្ស័យដោះផ្លាកលេខនិងគ្រឿងចេញជាបំណែកៗ។ក្រោយចាប់ខ្លួនសមត្ថកិច្ចនាំយកជនសង្ស័យទាំង៣នាក់រួមជាមួយវត្ថុតាង ទៅអធិការដ្ឋាននគរបាលខណ្ឌដើម្បីសាកសួរនិងកសាងសំណុំរឿង បញ្ជូនបន្តតាមនីតិវិធី៕ដោយ៖វិចិត្រ
