ភ្នំពេញ ៖ក្លិបអ្នកកាសែតកម្ពុជា ( ក.អ.ក ) នៅព្រឹកថ្ងៃទី២៣ ខែកុម្ភៈ ឆ្នាំ២០២៣នៅទីស្នាក់ការគណៈកម្មាធិការជាតិអូឡាំពិក (NOCC)បានសហការជាមួយគណៈកម្មការរៀបចំព្រឹត្តិការណ៍ស៊ីហ្គេមលើកទី៣២ រៀបចំសន្និសីទសារព័ត៌មានស្តីពី « វឌ្ឍនភាពនៃការត្រៀម SEA GAMES- ASEAN Para Games 2023 » ដែលកម្ពុជាធ្វើជាម្ចាស់ផ្ទះនៅទីស្នាក់ការគណៈកម្មាធិការជាតិអូឡាំពិក (NOCC)។
ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ ជាប្រធានគណ:កម្មាធិការជាតិអូឡាំពិកនិងជាអនុប្រធានអចិន្ត្រៃយ៍គណៈកម្មាធិការរៀបចំព្រឹត្តិការណ៍ស៊ីហ្គេមលើកទី៣២ និង ឯកឧត្តម វ៉ាត់ ចំរើន អគ្គលេខាធិការគណៈកម្មាធិការរៀបចំកីឡាស៊ីហ្គេមលើកទី៣២ បានអញ្ជើញជាវាគ្មិន។
សូមជម្រាបថាកីឡាស៊ីហ្គេម លើកទី៣២ នឹងបើកជាផ្លូវការនាថ្ងៃទី៥ ខែឧសភា និងបិទបញ្ចប់នាថ្ងៃទី១៧ ខែឧសភា ប៉ុន្តែប្រភេទកីឡាខ្លះនឹងចាប់ផ្តើមពីថ្ងៃទី២៩ ខែមេសាទៅ។ ចំណែកកីឡាអាស៊ានប៉ារ៉ាហ្គេម នឹងចាប់ផ្តើមពីថ្ងៃទី៣ ដល់ទី៩ ខែមិថុនា។ រហូតមកដល់ថ្ងៃ២៤កុម្ភៈនេះនៅសល់តែ៧០ថ្ងៃទៀតទេ។
រាជរដ្ឋាភិបាលកម្ពុជា នឹងផ្តល់ប្រាក់រង្វាន់លើកទឹកចិត្តសម្រាប់អត្តពលិកដែលដណ្តើមមេដាយទាំង៣ប្រភេទពីព្រឹត្តិការណ៍កីឡាស៊ីហ្គេមឆ្នាំ២០២៣ និងប៉ារ៉ាហ្គេមលើកទី១២។ សម្រាប់អ្នកឈ្នះមេដាយមាសនឹងទទួលបាន១ម៉ឺនដុល្លារ មេដាយប្រាក់ជាង៧ពាន់ដុល្លារ និងសំរឹទ្ធិជាង៣ពាន់ដុល្លារ។ នេះបើតាមការអះអាងរបស់លោក វ៉ាត់ ចំរើន អគ្គលេខាធិការគណៈកម្មការរៀបចំកីឡាស៊ីហ្កេមលើកទី៣២ (CAMSOC)។
ជុំវិញការចំណាយរបស់ម្ចាស់ផ្ទះកម្ពុជានៅស៊ីហ្គេម និងប៉ារ៉ាហ្គេម លោកវ៉ាត់ ចំរើន បានឱ្យដឹងថាកម្ពុជាត្រៀមប្រាក់ចំណាយ១២៤លានដុល្លារ លើដំណើរការកីឡាតំបន់អាស៊ានលើកទី៣២ និងប៉ារ៉ាហ្គេមលើកទី១២។
អគ្គលេខាធិការ CAMSOC បានបញ្ជាក់ថា៖««តាមការសម្រេចរបស់សម្តេចនាយករដ្ឋមន្ត្រីហ៊ុន សែន ប្រាក់៥០៥ពាន់លានរៀលដែលស្មើនឹង១២៤លានដុល្លារ នឹងត្រូវយកមកចំណាយលើការរៀបចំស៊ីហ្គេម និងប៉ារ៉ាហ្គេម។តែកម្ពុជាចំណាយតិចជាងការចំណាយរបស់ប្រទេសផ្សេងៗដែលធ្លាប់រៀបព្រឹត្តិការណ៍នេះពីមុនមក»។
ក្នុងព្រឹត្តិការណ៍តំបន់អាស៊ានលើកទី៣២ លោកវ៉ាត់ ចំរើន ក៏បានបញ្ជាក់ដែរថា អត្តពលិកកម្ពុជាចូលរួមប្រកួតប្រជែងគ្រប់កីឡាទាំង៣៧ប្រភេទតែម្តង។ ចំណោមកីឡាទាំង៣៧ មានតែកីឡាបាល់ទាត់លើតុ (Teq ball) ប៉ុណ្ណោះដែលជាប្រភេទកីឡាសំដែង និងមិនទទួលបានមេដាយ។ប្រភេទកីឡាទាំង៣៧ មាន១៦ប្រភេទកីឡាជាកីឡាអូឡាំពិក និង១៦កីឡាទៀតជាប្រភេទកីឡាតំបន់អាស៊ាន ហើយកីឡាផ្សេងទៀតជាកីឡាប្រជាប្រិយនិងពេញនិយមរបស់ម្ចាស់ផ្ទះកម្ពុជាដែលមានសិទ្ធិបញ្ចូលដោយខ្លួនឯង។
នៅក្នុងសន្និសីទសារពត៌មាននោះដែរ ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ ជាប្រធានគណៈកម្មាធិការជាតិអូឡាំពិកនិងជាអនុប្រធានអចិន្ត្រៃយ៍គណៈកម្មាធិការរៀបចំព្រឹត្តិការណ៍ស៊ីហ្គេមលើកទី៣២ បានលើកឡើងអំពីម្ហូបអាហារសម្រាប់កីឡាករ កីឡាការិនីនៅក្នុងស៊ីហ្គេម។
លោករដ្ឋមន្ត្រី បានមានប្រសាសន៍ថា៖ពាក់ព័ន្ធនឹងម្ហូបអាហារ គណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេមរបស់កម្ពុជាបានរៀបចំម្ហូបអាហារគ្រប់ប្រភេទទាំងអស់ ក្នុងនោះមានទាំងអាហារហាឡាល តាមតម្រូវរបស់ភ្ញៀវអន្តរជាតិ។
លោក ថោង ខុន អនុប្រធានអចិន្ត្រៃយ៍នៃគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ បានបញ្ជាក់ថា អាហារហូបចុក យើងបានរៀបចំហ្មត់ចត់ណាស់។ យើងមានក្រុមហ៊ុនទទួលបន្ទុករៀបចំអាហាររួចរាល់ហើយ។ ការដឹកជញ្ជូន យើងមានគ្រប់លក្ខណៈអស់ហើយ។ កន្លែងស្នាក់នៅធំគឺយើងមានភូមិកីឡា (Sport Village)។
ជាមួយគ្នានោះដែរលោករដ្ឋមន្ត្រីក៏បានធ្វើការអំពាវនាវដល់ប្រជាពលរដ្ឋចូលរួមសំអាតអនាម័យតាមផ្ទះឬមុខផ្ទះរបស់ខ្លួនឲ្យបានស្អាត ដើម្បីបរិស្ថាន និងមុខមាត់ប្រទេសជាតិយើង ត្រៀមស្វាគមន៍ព្រឹត្តិការណ៍ SEA GAME – ASEAN Para Games ដែលកម្ពុជាធ្វើជាម្ចាស់ផ្ទះ៕ដោយ៖សិរីមតី