មន្រ្តីសេតវិមានអាម៉េរិកបានជូនដំណឹងថា សហរដ្ឋអាម៉េរិកនឹងប្រកាសជំនួយសន្តិសុខចំនួន ២ពាន់លានដុល្លារបន្ថែមទៀតដល់រដ្ឋាភិបាលអ៊ុយក្រែន។
![](https://cambodiaflashnews.com/wp-content/uploads/2021/06/top-banner.gif)
យោងតាមលោកអ្នកនាំពាក្យប្រចាំសេតវិមាន Sullivan ដែលបាននិយាយនៅក្នុងព្រឹត្តិការណ៍សាល CNN កាលពីថ្ងៃព្រស្បតិ៍ ជំនួយសន្តិសុខថ្មីនេះ គឺជាការប្តេជ្ញាចិត្តរបស់រដ្ឋបាលប្រធានាធិបតីចូបៃដិន ក្នុងការប្រយុទ្ធប្រឆាំងបន្តនឹងអ្នកឈ្លានពានរុស្ស៊ី។ ២ពាន់លានដុល្លារនេះ គឺដើម្បីធានាបានថា អ៊ុយក្រែននឹងមានកម្លាំងដ៏រឹងមាំបន្ថែមទប់ទល់ការពារប្រទេស។ Sullivan ថា “យើងនឹងបន្តពិនិត្យមើលអ្វីដែលចាំបាច់ ដើម្បីឱ្យអ៊ុយក្រែនមានអ្វីដែលខ្លួនត្រូវការដើម្បីជោគជ័យនៅលើសមរភូមិ”។ លើសពីនេះ ក្រុមប្រទេសទាំងប្រាំពីរ ហៅថា (G7) ក៏នឹងប្រកាសនៅថ្ងៃសុក្រនូវកញ្ចប់ទណ្ឌកម្មជុំវិញថ្មីលើប្រទេសរុស្ស៊ីផងដែរ។
ឆ្លើយសំណួរអំពីសំណើអ៊ុយក្រែនសុំយន្តហោះចម្បាំង F-16 លោក Sullivan បាននិយាយតាមទស្សនៈរបស់ទីក្រុងវ៉ាស៊ីនតោនថា “យន្តហោះ F-16 មិនមែនជាសំណួរសម្រាប់ការប្រយុទ្ធរយៈពេលខ្លីនោះទេ។ F-16 គឺជាសំណួរសម្រាប់ការការពាររយៈពេលវែងរបស់អ៊ុយក្រែន” ។ គួរសង្កេតថា ត្រឹមតែរយៈពេល១សប្តាហ៍ប៉ុណ្ណោះ សហរដ្ឋអាម៉េរិកបានប្រកាសជំនួយរហូតដល់ពីរដងទៅហើយដល់អ៊ុយក្រែន។ ជំនួយកាលពីថ្ងៃចន្ទ ក្នុងដំណើរទស្សនកិច្ចបៃដិនទៅទីក្រុងគៀវ គឺមានចំនួន ៥០០លានដុល្លារដែលរួមបញ្ចូលឧបករណ៍ប្រយុទ្ធសំខាន់ៗ រួមទាំងប្រព័ន្ធការពារដែនអាកាស៕
ប្រភព៖ REUTERS
ប្រភពរូប៖REUTERS
ប្រែសម្រួល៖សុខ តុលា