មន្រ្តីដែលដំឡើងដោយរុស្ស៊ីបាននិយាយថា អ៊ុយក្រែនបានបាញ់ផ្លោងសម្លាប់បុគ្គលិកសង្រ្គោះ៣នាក់ ក្នុងពេលកំពុងជម្លៀសប្រជាជនចេញពីផ្ទះនៅក្នុងតំបន់ខេត្តដូណេតភាគខាងកើត។
មន្ត្រីដែលដំឡើងដោយរុស្ស៊ីប្រចាំតំបន់បាននិយាយកាលពីថ្ងៃព្រហស្បតិ៍ថា បុគ្គលិកសង្គ្រោះបីនាក់ដែលបានកំពុងព្យាយាមជម្លៀសមនុស្សចេញពីផ្ទះក្នុងទីក្រុង Donetsk ដែលគ្រប់គ្រងដោយរុស្ស៊ីនៅភាគខាងកើតអ៊ុយក្រែន ត្រូវបានសម្លាប់យ៉ាងអាណោចអាធ័មដោយការបាញ់ផ្លោងរបស់អ៊ុយក្រែន។ ទីភ្នាក់ងារព័ត៌មានរុស្ស៊ី TASS បានរាយការណ៍ថា ក្រុមគ្រូពេទ្យបានចូលទៅជួយសង្គ្រោះជនស៊ីវិល បន្ទាប់ពីការវាយប្រហារដំបូងនៃគ្រាប់ផ្លោងរបស់អ៊ុយក្រែន តែជាសំណាងអាក្រក់ការបាញ់ផ្លោងពីអ៊ុយក្រែនមិនបានបង្អង់ឡើយ ដោយបានវាយប្រហារបន្តកន្ទុយគ្នា សូម្បីតែបុគ្គលិកពេទ្យមួយចំនួនទៀតក៏បានរងរបួសដែរ។
លោក Dmitry Gartsev ដែលជាប្រធានក្រសួងសុខាភិបាលក្នុងតំបន់ដែលដំឡើងដោយរុស្ស៊ីបាននិយាយនៅលើបណ្តាញ Telegram របស់គាត់ថា គ្រូពេទ្យជួយសង្គ្រោះជីវិតរបស់បុគ្គលិក សង្គ្រោះទីបួន។ ជុំវិញព័ត៌មាននេះ មិនមានការអត្ថាធិប្បាយភ្លាមៗពីអាជ្ញាធរអ៊ុយក្រែនទេ។សមរភូមិក្តៅក្នុងខេត្តដូណេតកំពុងបន្តផ្ទុះឡើងខ្លាំងសម្បើមឈានចូលថ្ងៃសុក្រទី ២៤ ខែកុម្ភៈ ឆ្នាំ២០២៣នេះ ដែលត្រូវជាខួបមួយឆ្នាំនៃសង្រ្គាម៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
