ភ្នំពេញ៖ស្ត្រីម្នាក់អាចបណ្តាលពីមានវិបត្តិក្នុងគ្រួសារ ទើបនាំកូនស្រីតូចមកប៉ងលោតទឹកសម្លាប់ខ្លួនលើស្ពានជ្រោយចង្វា តែត្រូវអ្នកដំណើរនិងមន្ត្រីប្រចាំគោលដៅជួយឃាត់ទាន់។ហេតុការណ៍បង្កឱ្យភ្ញាក់ផ្អើលនេះស្ថិតនៅលើស្ពានជ្រោយចង្វា ក្នុងសង្កាត់/ខណ្ឌជ្រោយចង្វាកាលពីល្ងាចថ្ងៃទី២២ ខែកុម្ភៈ។
មន្ត្រីប្រចាំគោលដៅបានឱ្យដឹងថា ស្ត្រីរូបនោះមិនបានប្រាប់រឿងរ៉ាវនិងឈ្មោះរបស់ខ្លួនទេ។នាងមានអាយុប្រហែលជិត៣០ឆ្នាំ។
អ្នកដំណើរបានឱ្យដឹងថា មុនកើតហេតុ គេឃើញស្ត្រីម្នាក់មានទាំងក្មេងស្រីម្នាក់ផងបានជិះផាស្អេបឡើងស្ពាន។មកដល់ពាក់កណ្តាលស្រាប់តែនាងបានចុះដឹកដៃក្មេងស្រីប៉ងលោតទឹកសម្លាប់ខ្លួន តែត្រូវបានអ្នករត់ផាស្អេប និងនគរបាលគោលដៅជួយឃាត់ទាន់។ក្រោយឃាត់ពីការប៉ងលោតទឹករួច នាងបានព្យាយាមរត់ចូលរថយន្តទៀតដើម្បីសម្លាប់ខ្លួន។
អ្នកនៅជិតខាងផ្ទះនាងជួលស្នាក់នៅបានឱ្យដឹងថា នាងជាស្ត្រីមេម៉ាយមានកូនម្នាក់អាយុ៨ឆ្នាំ បានទំនាក់ទំនងស្នេហាជាមួយបុរសក្រោយជាកម្មករសំណង់។ពួកគេមកជួលផ្ទះស្នាក់នៅម្តុំសាលារៀនពញាក្រែក សង្កាត់ទួលសង្កែទី១ ខណ្ឌឫស្សីកែវ តែការរស់នៅមិនចុះសម្រុងគ្នាទេ។នៅល្ងាចថ្ងៃទី២២ ខែកុម្ភៈនេះ ត្រូវបានបុរសដៃគូដេញចេញពីផ្ទះ ទើបនាំកូនស្រីជិះផាស្អេបមកលោតទឹកប៉ងសម្លាប់ខ្លួនតែមិនបានសម្រេច៕ដោយ៖វិចិត្រ
