សាធារណរដ្ឋឆែកបានបញ្ជាក់ប្រាប់ឲ្យដឹងថា ខ្លួនបានបញ្ជូនរថក្រោះ ៨៩ គ្រឿង និងឧបករណ៍យោធាធុនធ្ងន់ជាច្រើនគ្រឿងផ្សេងទៀតទៅកាន់អ៊ុយក្រែន។
នេះដោយយោងតាមសម្ដីរបស់នាយករដ្ឋមន្រី្ត Petr Fiala បានបញ្ជាក់បន្ទាប់ពីជួបជាមួយប្រធានាធិបតីសហរដ្ឋអាម៉េរិក Joe Biden កាលពីថ្ងៃពុធ។ Fialaថា សាធារណរដ្ឋឆែកបានផ្គត់ផ្គង់សម្ភារយោធាធុនធ្ងន់រាប់រយគ្រឿងដល់ប្រទេសអ៊ុយក្រែន រួមទាំងរថក្រោះចំនួន ៨៩ គ្រឿង។ ដោយលម្អិតជាលើកដំបូងអំពីវិសាលភាពនៃការផ្គត់ផ្គង់របស់ឆែកក្រោមកិច្ចសហប្រតិបត្តិការរបស់រដ្ឋ និងវិស័យឯកជន លោក Fiala បាននិយាយថា ប្រទេសនេះថែមទាំងបានដឹកជញ្ជូនរថយន្តប្រយុទ្ធ និងរថពាសដែកចំនួន ២២៦ គ្រឿង កាំភ្លើងធំ ៣៨ គ្រឿង ប្រព័ន្ធបាញ់កាំជ្រួចរ៉ុក្កែតចំនួន ៣៣ គ្រឿង ប្រព័ន្ធការពារដែនអាកាសចំនួន ៦ និងឧទ្ធម្ភាគចក្រចំនួន ៤ គ្រឿងដល់អ៊ុយក្រែនទៀតផង។
ក៏ប៉ុន្តែបើយោងតាមស្ថានទូតអាម៉េរិកនៅទីក្រុង Prague សហរដ្ឋអាម៉េរិក បានផ្តល់ប្រាក់ប្រមាណ ២០០លានដុល្លារដល់សាធារណរដ្ឋឆែកហើយ ដើម្បីជាសំណងសម្រាប់ការបញ្ជូនអាវុធ និងសម្ភារយោធាទៅឲ្យអ៊ុយក្រែន ពោលគឺដើម្បីបំពេញឃ្លាំងស្តុកអាវុធរបស់ឆែកដែលបានថមថយយ៉ាងខ្លាំងដោយការផ្គត់ផ្គង់ក្នុងបរិមាណសម្បើមទៅអ៊ុយក្រែន៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា
