សមាជិកសហភាពអឺរ៉ុប កាលពីថ្ងៃពុធទី ២២ ខែកុម្ភៈ បានបរាជ័យក្នុងការអនុម័តយល់ព្រមលើកញ្ចប់ទណ្ឌកម្មថ្មីទី ១០ដាក់លើរុស្ស៊ី ដោយខកខានមិនបានសម្រេចដូចការរំពឹងទុក។
ប្រភពការទូតនៅក្នុងប្លុកនៃទីក្រុង Brussels បាននិយាយថា បណ្តាប្រទេសសហភាពអឺរ៉ុបបានបរាជ័យក្នុងការយល់ព្រមលើការដាក់ទណ្ឌកម្មថ្មីប្រឆាំងនឹងប្រទេសរុស្ស៊ី។ កញ្ចប់ដែលបានស្នើឡើងរួមមានការទប់ស្កាត់ពាណិជ្ជកម្មដែលមានតម្លៃជាង ១០ ពាន់លានអឺរ៉ូ (១០.៦ ពាន់លានដុល្លារ) រួមទាំងការហាមឃាត់ការនាំចូលកៅស៊ូរបស់សហភាពអឺរ៉ុបពីរុស្ស៊ី រារាំងការនាំចេញរបស់សហភាពអឺរ៉ុបទៅកាន់ប្រទេសរុស្ស៊ីនូវឧបករណ៍បច្ចេកវិទ្យា និងគ្រឿងបន្លាស់ដែលទីក្រុងមូស្គូអាចប្រើប្រាស់នៅលើសមរភូមិសុទ្ធតែមិនទទួលបានជោគជ័យដូចការរំពឹងទុកនោះទេ ខណៈប្រទេសមួយចំនួនបានខកខានមិនបានរាយការណ៍។
ប្រភពមួយបាននិយាយថា៖ “មានបញ្ហាជាច្រើនដែលនៅសេសសល់ ជាកត្តាមិនឲ្យទណ្ឌកម្មនេះកើតឡើងបាន នោះរួមមានទាំងការបិទការនាំចូលកៅស៊ូផងដែរ”។ ទិសដៅសំខាន់នៃការនាំចេញកៅស៊ូពីរុស្ស៊ីរួមមានទៅកាន់ប្រទេសចិន ឥណ្ឌា ប៉ូឡូញ តួកគី និងអាល្លឺម៉ង់។ បើទោះបីជាទណ្ឌកម្មនេះអាចប្រព្រឹត្តទៅបាន ឬយ៉ាងណា ប្រធានាធិបតីពូទីនបានអះអាងរួចហើយថា សេដ្ឋកិច្ចរុស្ស៊ីនឹងមិនប៉ះពាល់ឡើយ ព្រោះរុស្ស៊ីបានរៀបចំប្រុងជើងការខ្សែចង្វាក់យ៉ាងរឹងមាំ៕
ប្រភព៖ REUTERS
ប្រភពរូប៖REUTERS
ប្រែសម្រួល៖សុខ តុលា
