ប្រធានាធិបតីរុស្ស៊ី លោកវ្ល៉ាឌឹមៀរពូទីន បាននិយាយថា ទំនាក់ទំនងរវាងរុស្ស៊ី-ចិន គឺដើរតួសំខាន់ណាស់ក្នុងការធ្វើឲ្យមានស្ថិរភាពសកលលោក។
![](https://cambodiaflashnews.com/wp-content/uploads/2021/06/top-banner.gif)
លោកពូទីនពោលបែបនេះ ក្នុងអំឡុងកិច្ចប្រជុំជាមួយអ្នកការទូតកំពូលរបស់ប្រទេសចិនលោក Wang Yi កាលពីថ្ងៃពុធ ទី ២២ ខែកុម្ភៈ ឆ្នាំ២០២៣។ កិច្ចប្រជុំនេះធ្វើឡើងនៅពេលដែលប្រទេសចិនកំពុងព្យាយាមបង្ហាញខ្លួនជាអ្នកសម្របសម្រួល ហើយត្រូវបានគេរំពឹងថានឹងបង្ហាញ “ដំណោះស្រាយនយោបាយ” របស់ខ្លួនចំពោះជម្លោះអ៊ុយក្រែនក្នុងសប្តាហ៍នេះដែលត្រូវជាខួបមួយឆ្នាំនៃសង្រ្គាម។
ទីក្រុងប៉េកាំងបានស្វែងរកទីតាំងខ្លួនឯងជាគណបក្សអព្យាក្រឹត ខណៈពេលដែលបានរក្សាទំនាក់ទំនងជិតស្និទ្ធជាមួយសម្ព័ន្ធមិត្តរុស្ស៊ី។ ប៉ុន្តែទីក្រុងវ៉ាស៊ីនតោន និងអង្គការណាតូ បាននិយាយថា ពួកគេព្រួយបារម្ភថាប្រទេសចិនអាចនឹងត្រៀមបញ្ជូនអាវុធ និងគ្រាប់រំសេវ ដើម្បីជួយរុស្ស៊ីបន្តយុទ្ធនាការឈ្លានពានបន្ថែមទៀតនៅអ៊ុយក្រែន។ លោក Wang Yi បានប្រាប់លោក Putin ថា “ជាមួយភាគីរុស្ស៊ី យើងត្រៀមខ្លួនជាស្រេចក្នុងការពង្រឹងភាពជាដៃគូយុទ្ធសាស្ត្រ និងកិច្ចសហប្រតិបត្តិការស៊ីជម្រៅរបស់យើង” នេះបើយោងតាមការបកប្រែរបស់រុស្ស៊ី។ អ្នកការទូតកំពូលរបស់ចិនបានទទូចថា ភាពជាដៃគូរវាងប្រទេសទាំងពីរគឺ “មិនសំដៅប្រឆាំងនឹងប្រទេសទីបីណាមួយឡើយ តែក៏មិនចុះចាញ់នឹងសម្ពាធដែរ”។
បើតាមប្រភពសារព័ត៌មានអន្តរជាតិ លោក Wang Yi ត្រូវបានគេដឹងថា កំពុងស្ថិតនៅលើចំណតចុងក្រោយនៃដំណើរទស្សនកិច្ចអឺរ៉ុប ជួបជាមួយរដ្ឋមន្ត្រីការបរទេសអ៊ុយក្រែន Dmytro Kuleba៕
ប្រភព៖ AFP
ប្រភពរូប៖AFP
ប្រែសម្រួល៖សុខ តុលា