ក្រចេះ៖កម្លាំងនគរបាលស្រុកសំបូរ បានចាប់ស្ត្រីម្នាក់ករណីយកកាំបិតចុងស្រួចចាក់ចំបំពង់កប្តីរបស់ខ្លួនកំពុងដេកលក់ បណ្តាលឱ្យរងរបួសធ្ងន់។ហេតុការណ៍នេះបានកើតឡើងនៅភូមិអូរតាណឹង ឃុំក្បាលដំរី ស្រុកសំបូរ ខេត្តក្រចេះកាលពីរំលងអធ្រាត្រឈានចូលថ្ងៃទី២៣ ខែកុម្ភៈ។
![](https://cambodiaflashnews.com/wp-content/uploads/2021/06/top-banner.gif)
មន្ត្រីនគរបាលបានឱ្យដឹងថា ដំបូងមានដំណឹងថា ជនមិនស្គាល់មុខបានលួចផ្ទះឈ្មោះ អ៊ានក្រាញ អាយុ ៦៣ឆ្នាំ ប្រពន្ធឈ្មោះ ស្វាយ សារៈ អាយុ ៥៣ឆ្នាំ នៅភូមិ ឃុំខាងលើ ។ជននោះបានធ្វើសកម្មភាពប្រើកាំបិតចាក់ទៅលើឈ្មោះ អ៊ាន ក្រាញចំត្រង់បំពង់ក ពេលកំពុងដេកលង់លក់ជាមួយប្រពន្ធត្រូវបានគេជួយដឹកទៅមន្ទីរពេទ្យ។
មន្ត្រីដដែលបានបន្តថា ក្រោយពីទទួលបានព័ត៌មានភ្លាម កម្លាំងនគរបាលស្រុកសហការជាមួយកម្លាំងនគរបាលប៉ុស្តិ៍ក្បាលដំរី បានស្រាវជ្រាវកំណត់មុខសញ្ញាជនសង្ស័យ។តែជំនាញបានរកឃើញជនដៃដល់គឺជាប្រពន្ធជនរងគ្រោះ ហើយបានឃាត់ខ្លួននាំទៅសាកសួរ។
បន្ទាប់ពីសាកសួរ ស្ត្រីរូបនោះបានសារភាពថា ខ្លួនបានយកកាំបិតចុងស្រួចចាក់ចំបំពង់កប្តីរបស់ខ្លួនពិតប្រាកដមែនដោយសាតែទំនាស់ពាក្យសម្តី។ជនសង្ស័យកំពុងឃាត់ខ្លួននៅអធិការដ្ឋាននគរបាលស្រុកសំបូរ ដើម្បីកសាងសំណុំរឿងបញ្ជូនបន្ត៕ដោយ៖វីរ