រដ្ឋាភិបាលអ៊ុយក្រែន បានប្រកាសប្រាប់ឲ្យសិស្សរៀនពីចម្ងាយនៅក្នុងសប្តាហ៍នេះ ចំពេលមានការភ័យខ្លាចការវាយប្រហារគម្រប់ខួបមួយឆ្នាំរបស់រុស្ស៊ី ថ្ងៃ២៤ កុម្ភៈ។
សល់តែពីរថ្ងៃទៀតប៉ុណ្ណោះគឺដល់ខួបគម្រប់មួយឆ្នាំនៃសង្រ្គាម ២៤ កុម្ភៈរបស់រុស្ស៊ីហើយ។ យោងតាមសារព័ត៌មានអាល់ចាហ្សេរ៉ា រដ្ឋាភិបាលហ្សេឡិនស្គី បានជូនដំណឹងដល់សាលារៀនទាំងអស់មេត្តាចាប់ផ្តើមរៀនពីចម្ងាយពីថ្ងៃពុធតទៅ រហូតឲ្យផុតក្នុងសប្តាហ៍នេះ ដើម្បីជៀសវាងហានិភ័យគ្រោះថ្នាក់ពីការវាយប្រហារគ្រាប់បែករបស់រុស្ស៊ី។ ក្រសួងអប់រំបានចេញសេចក្តីថ្លែងការណ៍មួយដោយនិយាយថា ខ្លួនបានធ្វើអនុសាសន៍ដល់សាលានានា “ដើម្បីការពារអាយុជីវិតនិងសុខភាពអ្នកចូលរួមទាំងអស់ក្នុងដំណើរការអប់រំជាវិធានការបង្ការមុនថ្ងៃគម្រប់ខួប”។
សាលារៀនរាប់រយត្រូវបានបំផ្លាញអំឡុងពេលរុស្ស៊ីឈ្លានពានអ៊ុយក្រែនដំបូង។ ចំពោះអ្នកដែលត្រូវបានអនុញ្ញាតឱ្យមកដល់ផ្ទាល់ក្នុងឆ្នាំសិក្សានេះ លុះត្រាតែពួកគេមានធ្វើលេណដ្ឋានត្រៀមចាំជ្រកគ្រាប់បែក។ យ៉ាងណាក៏ដោយ ក្រសួងនៅតែលើកទឹកចិត្តសម្រាប់ការរៀនពីចម្ងាយ ដើម្បីសុវត្ថិភាពទាំងអស់គ្នា៕
ប្រភព៖ ALJAZEERA
ប្រភពរូប៖ ALJAZEERA
ប្រែសម្រួល៖សុខ តុលា
