ថ្វីបើលោកខាងលិចបានដាក់ទណ្ឌកម្មច្រើនលើកច្រើនសាធ្ងន់ធ្ងរប៉ុនណាក៏ដោយ លោកពូទីនបាននិយាយថា សេដ្ឋកិច្ចរុស្ស៊ីនៅតែអាចឈរទប់ទល់បានយ៉ាងល្អ។
![](https://cambodiaflashnews.com/wp-content/uploads/2021/06/top-banner.gif)
លោកវ្ល៉ាឌឹមៀរពូទីន ថារុស្ស៊ីមានធនធានហិរញ្ញវត្ថុទាំងអស់គ្រប់គ្រាន់ដែលខ្លួនត្រូវការដើម្បីធានាសន្តិសុខជាតិ និងការអភិវឌ្ឍរបស់ខ្លួន បើទោះបីជាមានការដាក់ទណ្ឌកម្មសេដ្ឋកិច្ចយ៉ាងខ្លាំងក្លាដោយលោកខាងលិចជុំវិញសង្គ្រាមនៅអ៊ុយក្រែនក៏ដោយ។ ប្រធានាធិបតីរុស្ស៊ីរូបនេះ បានឲ្យដឹងទៀតថា ក្រុមហ៊ុនក្នុងស្រុកបានកសាងខ្សែសង្វាក់ផ្គត់ផ្គង់របស់ពួកគេឡើងវិញ ជាការឆ្លើយតបទៅនឹងការដាក់ទណ្ឌកម្ម។ ហើយទីក្រុងមូស្គូកំពុងធ្វើការជាមួយប្រទេសផ្សេងទៀតក្នុងការបង្កើតប្រព័ន្ធទូទាត់ថ្មី និងស្ថាបត្យកម្មហិរញ្ញវត្ថុ។
ការបញ្ជាក់បានកើតឡើងក្រោយគ្នានឹងសហភាពអឺរ៉ុប កំពុងខិតជិតបញ្ចប់កញ្ចប់ទណ្ឌកម្មទី ១០ ប្រឆាំងរុស្ស៊ីដែលមានតម្លៃ ១១ពាន់លានអឺរ៉ូ ស្មើនឹង១១.៧ពាន់លានដុល្លារ។ អ្នកការទូតសហភាពអឺរ៉ុបបាននិយាយថា សហភាពអឺរ៉ុបជិតឈានដល់ការព្រមព្រៀងលើកញ្ចប់ទណ្ឌកម្មទី ១០ ប្រឆាំងនឹងរុស្ស៊ីសម្រាប់ការឈ្លានពានអ៊ុយក្រែនហើយ រដ្ឋាភិបាលសហភាពអឺរ៉ុបសង្ឃឹមថានឹងឈានដល់កិច្ចព្រមព្រៀងមួយនៅថ្ងៃពុធ ប្រសិនបើយកឈ្នះលើការហាមឃាត់ការនាំចូលកៅស៊ូ និងពេជ្ររបស់រុស្ស៊ី។ សហភាពអឺរ៉ុបក៏មានគម្រោងហាមឃាត់ការលក់ចេញទៅរុស្ស៊ីនូវរាល់គ្រឿងប្រើប្រាស់គ្រឿងអេឡិចត្រូនិចប្រើជាគ្រឿងប្រព័ន្ធប្រដាប់អាវុធ ដូចជាយន្តហោះគ្មានមនុស្សបើក កាំជ្រួច និងឧទ្ធម្ភាគចក្រផងដែរ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា