បាត់ដំបង÷ ប្រជាពលរដ្ឋប្រទះឃើញគ្រាប់មិនទាន់ផ្ទុះជាច្រើនកប់ក្នុងដី បង្កការភ្ញាក់ផ្អើលនៅរសៀលថ្ងៃទី ២២ ខែកុម្ភៈ ឆ្នាំ ២០២៣ ក្នុងក្រុមទី៧ ភូមិវត្តរំដួល សង្កាត់ចំការសំរោង ក្រុងបាត់ដំបង ខេត្តបាត់ដំបង។
នគរបាលគ្រប់គ្រងអាវុធគ្រឿងផ្ទុះ និងជាតិពុល នៃស្នងការដ្ឋាននគរបាលខេត្តបាត់ដំបងបញ្ជាក់ថា ក្បាលគ្រាប់កាំភ្លើង និងរំសេវជាតិផ្ទុះជាច្រើនគ្រាប់ មានចំនួនច្រើនគីឡូ
ដែលពលរដ្ឋប្រទះឃើញ គឺជាគ្រាប់យុទ្ធភណ្ឌដែលនៅរាយប៉ាយកប់ក្នុងដីសល់ពីសម័យសង្គ្រាម ដែលអាចបង្កគ្រោះថ្នាក់គ្រប់ពេល។ ក្បាលគ្រាប់កាំភ្លើង ( UXO ) ដែលប្រទះឃើញនេះរួមមាន: ប្រភេទ ៣៧មិល្លីម៉ែត្រចំនួន ៣០គ្រាប់ និងរំសេវចំនួន ៣ គីឡូក្រាម។
បន្ទាប់ពីចុះពិនិត្យកម្លាំងនគរបាលមូលដ្ឋាន សហការជាមួយមន្ត្រីជំនាញអង្គភាពស៊ីម៉ាក់ បានយកក្បាលគ្រាប់ និងរំសេវទាំងអស់នោះ យកទៅរក្សាទុកនិងកម្ទេចចោលនៅពេលក្រោយ៕
ដោយ: ប្រសិទ្ធ
