ភ្នំពេញ៖កាលពីយប់ថ្ងៃទី២០ ខែកុម្ភៈ ផ្ទះប្រជាពលរដ្ឋនៅ២កន្លែងផ្សេងគ្នា ត្រូវអគ្គិភ័យបានលេបត្របាក់ជាមួយទ្រព្យសម្បត្តិអស់ទាំងស្រុងក្នុងរាជធានីភ្នំពេញ។
![](https://cambodiaflashnews.com/wp-content/uploads/2021/06/top-banner.gif)
ហេតុការណ៍ទី១ កាលពីម៉ោងជាង២១យប់ ថ្ងៃទី២០ ខែកុម្ភៈ អគ្គិភ័យបានកើតឡើងនៅតាមផ្លូវលេខ៣៧១ មុខស្ថានីយបូមទឹកស្អុយបឹងទំពុន ក្នុងខណ្ឌដង្កោ បានឆាបឆេះផ្ទះ១ខ្នងសង់ពីថ្មប្រក់សង្ក័សី ម្ចាស់ធ្វើអាជីវកម្មជួសជុលម៉ូតូត្រូវភ្លើងឆេះទាំងទ្រព្យសម្បត្តិអស់គ្មានសល់។
បន្ទាប់មកនៅម៉ោង២២យប់ថ្ងៃដដែល អគ្គិភ័យបានឆាបឆេះផ្ទះមួយខ្នងទៀតសង់ពីថ្មក្រោមឈើលើនៅក្បែរគល់ស្ពានព្រះមុនីវង្សថ្មី ភូមិព្រែក សង្កាត់/ខណ្ឌច្បារអំពៅ ជាមួយទ្រព្យសម្បត្តិអស់ទាំងស្រុង។ គ្រោះអគ្គិភ័យទាំង២កន្លែងនេះ កម្លាំងសមត្ថកិច្ចបានចេញរថយន្ត សរុប២៣គ្រឿងជួយអន្តរាគមន៍បាញ់ទឹកពន្លត់។
ចំពោះមូលហេតុកើតឡើងទាំង២កន្លែងខាងលើនេះ សមត្ថកិច្ចជំនាញបានបញ្ជាក់ថា បណ្តាលមកពីឆ្លងចរន្តអគ្គិសនី។ប៉ុន្តែក្នុងគ្រោះមហន្តរាយនេះមិនបង្កឱ្យមានគ្រោះថ្នាក់ដល់ជីវិតមនុស្សទេ។ជាមួយនេះដែរគេមិនទាន់ដឹងពីទំហំនៃការខូចខាតនៅឡើយ ព្រោះសមត្ថកិច្ចកំពុងសាកសួរ៕ដោយ៖វិចិត្រ