ក្រឡេកទៅឯប្រេស៊ីលវិញ មនុស្សជិត៤០នាក់បានស្លាប់នៅភាគអាគ្នេយ៍ បន្ទាប់ពីភ្លៀងធ្លាក់ខ្លាំងកាលពីថ្ងៃអាទិត្យបង្កជាគ្រោះមហន្តរាយទឹកជំនន់ និងរអិលបាក់ដី។
![](https://cambodiaflashnews.com/wp-content/uploads/2021/06/top-banner.gif)
យោងតាមសេចក្តីថ្លែងការណ៍របស់អាជ្ញាធររដ្ឋ Sao Paulo ប្រទេសប្រេស៊ីលកាលពីថ្ងៃអាទិត្យទី ១៩ ខែកុម្ភៈ ឆ្នាំ២០២៣ បានឲ្យដឹងថា ភ្លៀងបានបន្តធ្លាក់ខ្លាំងនៅតំបន់ឆ្នេរភាគអាគ្នេយ៍នៃប្រទេសប្រេស៊ីល ដែលបានបណ្តាលឱ្យមានទឹកជំនន់ និងការរអិលបាក់ដីទាំងផ្ទាំងៗ ដោយបានសម្លាប់មនុស្សយ៉ាងហោចណាស់ ៣៦ នាក់ និងមនុស្សរាប់រយនាក់ផ្សេងទៀតត្រូវបានជម្លៀសខ្លួន។ ក្រុមអ្នកជួយសង្គ្រោះបានបន្តស្វែងរកជនរងគ្រោះ តភ្ជាប់ផ្លូវថ្នល់សហគមន៍ដាច់ស្រយាលឡើងវិញ ខណៈផ្លូវមួយចំនួននៅតែត្រូវបានបិទ ជាប់គាំងមនុស្សម្នា អ្នកទេសចរដែលនាំគ្នាទៅលេងពិធីបុណ្យប្រទេសប្រេស៊ីល។ បើតាមសារព័ត៌មានក្នុងស្រុក ប្រតិបត្តិការនៅកំពង់ផែ Santos ដែលជាកំពង់ផែធំបំផុតរបស់អាម៉េរិកឡាទីន ត្រូវបានរំខានចំពេលមានខ្យល់កន្រ្តាក់ខ្លាំងជាង ៥៥ គីឡូម៉ែត្រក្នុងមួយម៉ោង និងរលកទឹកកម្ពស់ជាងមួយម៉ែត្រ។
ការព្យាករណ៍អាកាសធាតុបានបង្ហាញថា ភ្លៀងធ្លាក់ខ្លាំងនឹងបន្តបង្អុរចុះនៅតំបន់ឆ្នេរសមុទ្រ Sao Paulo បន្ថែមទៀត ហើយត្រូវតែត្រៀមទុកក្រុមការពារជនស៊ីវិល ក្រុមសង្គ្រោះរបស់នាយកដ្ឋានពន្លត់អគ្គិភ័យ ខណៈចំនួនអ្នកស្លាប់រំពឹងថាអាចនឹងកាន់តែខ្ពស់៕
ប្រភព៖ REUTERS
ប្រភពរូប៖REUTERS
ប្រែសម្រួល៖សុខ តុលា