ភ្នំពេញ៖ប្រទេសកម្ពុជានឹងមានមជ្ឈមណ្ឌលភស្តុភារទំនើបលំដាប់ពិភពលោកដំបូងគេ បន្ទាប់ពីសាជីវកម្មហិរញ្ញវត្ថុអន្តរជាតិ (IFC)
បានចុះហត្ថលេខាលើកិច្ចព្រមព្រៀងសហការថ្មីមួយជាមួយក្រុមហ៊ុនភស្តុភារឈានមុខចំនួនពីរនៅក្នុងតំបន់នាពេលថ្មីៗនេះ។ភាពជាដៃគូនេះនឹងផ្តល់នូវការជំរុញដ៏សំខាន់ដល់ហេដ្ឋារចនាសម្ព័ន្ធ ពាណិជ្ជកម្ម និងការតភ្ជាប់នៅក្នុងតំបន់អាស៊ីអាគ្នេយ៍។
Cambodia SuperPort TM ឬ មជ្ឈមណ្ឌលភស្តុភារភ្នំពេញ (PPLC) នឹងត្រូវបានអភិវឌ្ឍដោយក្រុមហ៊ុន PPLC Support and Industrial Co. Ltd. ដែលជាការបណ្តាក់ទុនរួមគ្នារវាងក្រុមហ៊ុនភស្តុភារឈានមុខគេនៅអាស៊ី YCH Groupនិង ក្រុមហ៊ុន ផ្តល់សេវាកម្មភស្តុភារធំជាងគេរបស់កម្ពុជាគឺ WorldBridge Group ។
ទីតាំងយុទ្ធសាស្ត្ររបស់ SuperPort TM នៅរាជធានីភ្នំពេញ ជាចំណុចកណ្តាលនៃប្រទេសនិងជាមជ្ឈមណ្ឌលសេដ្ឋកិច្ចរបស់ខ្លួនជាមួយនឹងការតភ្ជាប់ទៅកាន់គ្រប់មធ្យោបាយនៃការដឹកជញ្ជូន នឹងអាចឱ្យSuperPort TM ក្លាយជាកន្លែងដឹកជញ្ជូនពហុទម្រង់ពេញលេញដំបូងបង្អស់របស់ប្រទេសកម្ពុជា។
ដោយសារប្រទេសកម្ពុជាស្ថិតនៅចំកណ្តាលនៃមហាអនុតំបន់មេគង្គ SuperPort TM អាចដើរតួជាមជ្ឈមណ្ឌលដឹកជញ្ជូននិងភស្តុភារ ក្នុងតំបន់ ដែលរួមចំណែកដល់ការផ្លាស់ប្តូរផ្លូវពាណិជ្ជកម្មតាមប្រទេសកម្ពុជា។ការណ៍នេះនឹងជួយកាត់បន្ថយការចំណាយលើផ្នែក ភស្តុភារទាំងមូល ការកែលម្អប្រសិទ្ធភាពច្រវ៉ាក់ផ្គត់ផ្គង់ដើម្បីធ្វើសមាហរណកម្មក្នុងតំបន់ និងជំរុញការ ប្រកួតប្រជែងរបស់កម្ពុជា៕ដោយៈផាវី
