រតនគិរី៖តុលាការខេត្តរតនគិរី កាលពីថ្ងៃទី១៧ ខែកុម្ភៈ បានដោះលែងមនុស្សប្រុសស្រីចំនួន១៥នាក់ឱ្យនៅក្រៅឃុំជាបណ្ដោះអាសន្ន ពាក់ព័ន្ធនឹងការផលិតទឹកឃ្មុំក្លែងក្លាយ។
សូមបញ្ជាក់ថា កាលពីយប់ថ្ងៃទី១៥ ខែកុម្ភៈកន្លងទៅ កម្លាំងនគរបាលប្រឆាំងបទល្មើសសេដ្ឋកិច្ចខេត្តរតនគិរីបានឃាត់ខ្លួនមនុស្សប្រុសស្រីចំនួន១៥នាក់នៅផ្ទះសំណាក់យីហោ“មិត្តភាពសំណាងល្អ” ស្ថិតក្នុងភូមិជ័យជំនះ សង្កាត់ឡាបានសៀក ក្រុងបានលុង។
ក្នុងប្រតិបត្តិការនោះ សមត្ថកិច្ចរឹបអូបម៉ូតូចំនួន១៥គ្រឿង-ទឹកឃ្មុំប្រមាណ២០០លីត្រ រួមនិងវត្ថុធាតុផ្សំមួយចំនួនទៀតហើយបញ្ជូនសំណុំរឿងទៅតុលាការ។ សមត្ថកិច្ចបានឱ្យដឹងថា បន្ទាប់ពីសមត្ថកិច្ចឃាត់ខ្លួនបាន២ថ្ងៃ លោកឆេង សុខនី ជាមេធាវីការពារសិទ្ធិឱ្យជនទាំង១៥នាក់បានធានាឱ្យពួកគេនៅក្រៅឃុំបណ្តោះអាសន្ន ផ្អែកតាមច្បាប់ស្តីពីកិច្ចការពារអ្នកប្រើប្រាស់ក៏ប៉ុន្តែនៅបន្តនីតិវិធី។
ជុំវិញការដោះលែងនេះ មតិជាច្រើនបានលើកឡើងថា ការផលិតទឹកឃ្មុំក្លែងក្លាយលក់បោកប្រាស់ជាយូរឆ្នាំមកហើយ ស្ថាប័នច្បាប់ត្រូវតែស៊ើបអង្កេតដើម្បីដាក់ទោសដល់អ្នកប្រព្រឹត្តបទល្មើសឱ្យបានធ្ងន់ធ្ងរ៕ដោយ:សុខុម
