ភ្នំពេញ៖បុរសម្នាក់ត្រូវក្រុមគ្រួសារសង្កេតឃើញ មួយរយៈចុងក្រោយនេះមានភាពស្ងាត់ស្ងៀមខុសធម្មតា។ក្រោយមកបានយកសាំងចាក់ដុតខ្លួនឯងឆេះប្រកាច់ននៀលលើដីឃើញគួរឱ្យតក់ស្លុត និងម៉ូតូ១គ្រឿងឆេះអស់គ្មានសល់។ករណីនេះបានកើតឡើងនៅម្តុំដីវាលមួយច្រកចូលកំពង់ចម្លងកោះនរា ភូមិបឹងឈូក សង្កាត់និរោធ ខណ្ឌច្បារអំពៅ កាលពីថ្ងៃទី១៩ ខែកុម្ភៈ។
![](https://cambodiaflashnews.com/wp-content/uploads/2021/06/top-banner.gif)
សមត្ថកិច្ចបានឱ្យដឹងថា អ្នកប៉ងធ្វើអត្តឃាតនោះឈ្មោះ គាត់សំ អាយុ៦៧ឆ្នាំ នៅភូមិក្បាលទំនប់ សង្កាត់បឹងទំពុន ខណ្ឌមានជ័យ ។បុរសរូបនេះបានចាក់សាំងដុតខ្លួនឯងបណ្ដាលឱ្យឆេះប្រកាច់លើដីរងរបួស-រលាករលេះសាច់ ត្រូវបានគេជួយដឹកទៅមន្ទីរពេទ្យភ្លាម។ប៉ុន្តែអ្នកភូមិបាននិយាយថា មិនដឹងវាសនាយ៉ាងណាទេ ព្រោះអាការធ្ងន់ធ្ងរពេក។រីឯម៉ូតូម៉ាកឌ្រីមផ្លាកលេខភ្នំពេញ1AV 0413 ត្រូវភ្លើងឆេះខ្ទេចដោយម្ចាស់បានយកសាំងមួយប៊ីដុង ៥លីត្រមកចាក់ដុតតែម្តង។
ក្នុងហេតុការណ៍នេះ ប្រពន្ធបុរសខាងលើបានឱ្យដឹងថា ប្ដីគាត់មានជំងឺប្រចាំកាយ ដោយមួយរយៈចុងក្រោយនេះមានសភាពខុសប្លែក។តាមការសន្និដ្ឋានពីនគរបាលកោសល្យវិច័យបានបញ្ជាក់ថា ជនដុតខ្លួនឯងនេះមានសង្ឃឹមរស់តិចតួចណាស់៕ដោយ៖វិចិត្រ