រដ្ឋាភិបាលប្រទេសរុស្ស៊ីបាននិយាយថា អ្នកកាសែតលោកខាងលិចណាក៏ដោយឲ្យតែឈ្លើយ ពួកគេនឹងមិនត្រូវបានអត់ឱនទោសឲ្យឡើយ។
![](https://cambodiaflashnews.com/wp-content/uploads/2021/06/top-banner.gif)
ក្រសួងការបរទេសរុស្ស៊ីបានព្រមានអ្នកកាសែតលោកខាងលិចកាលពីថ្ងៃសុក្រថា ប្រសិនបើពួកគេប្រព្រឹត្តដោយគ្មានវិជ្ជាជីវៈ និងប្រព្រឹត្តចំពោះប្រទេសរុស្ស៊ី ឬប្រជាជនរបស់ខ្លួនក្នុងផ្លូវដ៏ឈ្លើយ នោះពួកគេនឹងមិនត្រូវបានអត់ឱនឡើយ។ អ្នកនាំពាក្យក្រសួង លោកស្រី Maria Zakharova បាននិយាយថា នៅពេលដែលអ្នកឆ្លើយឆ្លងព័ត៌មានលោកខាងលិចជាន់ខ្ពស់បានជួបរដ្ឋមន្ត្រីការបរទេស Sergey Lavrov នៅទីក្រុងមូស្គូក្នុងសប្តាហ៍នេះ អ្នកខ្លះបានត្អូញត្អែរអំពីលក្ខខណ្ឌការងាររបស់ពួកគេ រួមទាំងការចេញទិដ្ឋាការ និងការទទួលស្គាល់ផងដែរ។ លោកស្រីចោទសួរបកទៅអ្នកសារព័ត៌មានវិញថា “តើពួកគេចង់បានលក្ខខណ្ឌប៉ុន្មានឆ្នាំតាមដែលចិត្តចង់បានឲ្យប្រាកដ?” “វាចប់សព្វគ្រប់ហើយ”។ “ឥឡូវនេះពួកគេនឹងរស់នៅតាមរបៀបថ្មី”។
ថ្លែងជាចុងក្រោយ លោកស្រី Zakharova បានព្រមានថា បើអ្នកកាសែតទាំងនោះធ្វើការដោយវិជ្ជាជីវៈ នោះពួកគេនឹងអាចបន្តដំណើរការបាន តែបើមិនដូច្នេះ ពួកគេក៏នឹងមិនអាចបន្តបានដែរ។ “ពួកគេនឹងមិនត្រូវបានស្វាគមន៍ឡើយ”។
ការព្រមាននេះ កើតឡើងបន្ទាប់ពីតុលាការកំពូលរុស្ស៊ីស្រុកស៊ីបេរីទើបតែបានកាត់ទោសអ្នកកាសែតក្នុងស្រុកស្រីម្នាក់ឲ្យជាប់ពន្ធនាគាររយៈពេល៦ឆ្នាំ និងបិទមិនឲ្យធ្វើកាសែត៥ឆ្នាំ ពីបទផ្សាយព័ត៌មានបង្កាច់បង្ខូចកងកម្លាំងរុស្ស៊ីនៅអ៊ុយក្រែន៕
ប្រភព៖ ALJAZEERA
ប្រភពរូប៖ ALJAZEERA
ប្រែសម្រួល៖សុខ តុលា