ភ្នំពេញ៖ បុរសម្នាក់ទំនងស្រវឹងបានបើករថយន្តយ៉ាងលឿនទៅបុកតូបលក់ទំនិញនៅលើចិញ្ចើមផ្លូវឱ្យខ្ទេចខ្ទី ហើយបន្តទៅបុកបង្គោលភ្លើងបណ្តាលឱ្យបាក់មួយដើមទៀត។គ្រោះថ្នាក់ចរាចរនេះបានកើតឡើងនៅតាមផ្លូវជាតិលេខ៦ ក្នុងសង្កាត់ព្រែកលៀប ខណ្ឌជ្រោយចង្វា កាលពីរំលងអធ្រាត្រឈានចូលថ្ងៃទី១៨ ខែកុម្ភៈ ឆ្នាំ២០២៣។
![](https://cambodiaflashnews.com/wp-content/uploads/2021/06/top-banner.gif)
អ្នកឃើញហេតុការណ៍បានឱ្យដឹងថា ដំបូងមានរថយន្តម៉ាកLexus LX470 ផ្លាកលេខភ្នំពេញ2AA-1846 បើកតាមផ្លូវជាតិលេខ៦ ពីកើតទៅលិចក្នុងល្បឿនលឿន។
មកដល់កន្លែងខាងលើ អ្នកបើកបរទំនងស្រវឹង ស្រាប់តែរថយន្តរេចង្កូតជ្រុលទៅបុកតូបលក់ទំនិញនៅលើចិញ្ចើមផ្លូវ បណ្តាលឱ្យតូបចំនួន៣បានបាក់បែកខ្ទេចខ្ទីនិងខូចខាតគ្រឿងភេសជ្ជៈអស់ជាច្រើន។ពេលនោះរថយន្តមិនទាន់អស់ល្បឿនក៏ជ្រុលទៅបុកបង្គោលភ្លើងបាក់មួយដើម តែមិនបង្កគ្រោះថ្នាក់ដល់ជីវិតមនុស្សទេ។
ក្រោយកើតហេតុ អ្នកបើករថយន្តបានចុះរត់គេចខ្លួនបាត់។នគរបាលចរាចរណ៍រាជធានីភ្នំពេញបានមកស្ទូចយករថយន្តនោះទៅទុកដើម្បីឱ្យម្ចាស់ចូលខ្លួនដោះស្រាយពេលក្រោយ៕ដោយ៖វិចិត្រ