ភ្នំពេញ៖រថយន្តឃ្លុបដឹកទំនិញបានបុករួចកិនម៉ូតូនិងអូសជាង១០០ម៉ែត្រ បណ្តាលឱ្យក្មេងស្រីម្នាក់ស្លាប់ពេលបញ្ជូនទៅមន្ទីរពេទ្យ។គ្រោះថ្នាក់ចរាចរនេះបានកើតឡើងនៅជាប់របងវត្តព្រៃស្ពឺខាងកើត ភូមិព្រៃស្ពឺ សង្កាត់ចោមចៅទី២ ខណ្ឌពោធិ៍សែនជ័យ កាលពីរសៀលថ្ងៃទី១៧ ខែកុម្ភៈ។
សមត្ថកិច្ចបានឱ្យដឹងថា ក្មេងស្រីរងគ្រោះបាត់បង់ជីវិតឈ្មោះម៉ៅ ស្រីឡែន អាយុ១៥ឆ្នាំ ស្នាក់ភូមិព្រៃស្ពឺ សង្កាត់ចោមចៅទី២ ខណ្ឌពោធិ៍សែនជ័យ។
មុនកើតហេតុ ក្មេងស្រីរងគ្រោះជិះម៉ូតូម៉ាកធូដេ ផ្លាកលេខភ្នំពេញ1GO-6010 ធ្វើដំណើរតាមផ្លូវបេតុងពីត្បូងទៅជើង។មកដល់កន្លែងខាងលើប្រុងបត់ ស្រាប់តែមានរថយន្តឃ្លុបដឹកទំនិញ ផ្លាកលេខភ្នំពេញ3D-0251 បើកមកបុករួចកិនអូសប្រហែលជាង១០០ម៉ែត្របណ្តាលឱ្យក្មេងស្រីរងរបួសបាក់ជើងធ្ងន់ធ្ងរ រួចបានស្លាប់ពេលដឹកទៅមន្ទីរពេទ្យ។
ក្រោយកើតហេតុ នគរបាលចរាចរណ៍រាជធានីភ្នំពេញបាននាំរថយន្ត-ម៉ូតូទៅទុកនិងបន្តរកអ្នកបើកបរយកមកទទួលខុសត្រូវក្នុងករណីនេះ៕ដោយ៖វិចិត្រ
