ស្ទឹងត្រែង៖ករណីលិចទូកអ្នកភូមិកោះកីដឹកមនុស្ស៨នាក់ឆ្លងកាត់ទន្លេមេគង្គក្នុងខេត្តស្ទឹងត្រែង ហើយបាត់ខ្លួន៤នាក់នោះ រហូតមកដល់រសៀលថ្ងៃទី១៧ ខែកុម្ភៈ សពបានរកឃើញជាបន្តបន្ទាប់សរុប៤នាក់។
សមត្ថកិច្ចបានឱ្យដឹងថា សាកសពដែលត្រូវកម្លាំងចម្រុះប្រទះឃើញបានអណ្តែតដល់ព្រំប្រទល់កោះខនឌឹន ភូមិខាំផាន់ សង្កាត់សាមគ្គី ក្រុងស្ទឹងត្រែង ចម្ងាយពីកន្លែងកើតហេតុប្រមាណជា២គីឡូម៉ែត្រ។សពជនរងគ្រោះរកឃើញជាបន្តបន្ទាប់សរុប៤នាក់ ដែលបានលិចទូកនៅក្នុងទឹកទន្លេត្រង់កន្ទុយកោះហាន ឃុំកោះស្នែង ស្រុកបុរីអូរស្វាយសែនជ័យ កាលពីថ្ងៃទី១៤ ខែកុម្ភៈកន្លងមក។
សពរកឃើញដំបូងឈ្មោះសុត មី អាយុ៥៨ឆ្នាំ ជាឪពុក នៅចម្ងាយប្រហែល ៤០០ម៉ែត្រពីកន្លែងកើតហេតុ។ថ្ងៃបន្ទាប់រកឃើញ២នាក់គឺកូនស្រីឈ្មោះម៉ី សុគ្រី អាយុ២៥ឆ្នាំ ព្រមទាំងចៅប្រុសឈ្មោះ លួយហាត់ អាយុ៦ឆ្នាំ។នៅរសៀលថ្ងៃទី១៧ ខែកុម្ភៈនេះរកឃើញចៅប្រុសម្នាក់ទៀតឈ្មោះលូយ ចន្ទ្រា អាយុ៨ឆ្នាំ។
ជនរងគ្រោះករណីលិចទូកបាត់ខ្លួនកាលពីថ្ងៃទី១៤កុម្ភៈរហូតមកដល់រសៀលថ្ងៃទី១៧កុម្ភៈនេះបានរកឃើញអស់ហើយចំនួន៤នាក់៕ដោយ:សុខុម
