ភ្នំពេញ៖ ចេកអំបូងលឿងដែលកំពុងដាំដុះនៅក្នុងខេត្តកំពត ត្រូវបាននាំចេញទៅកាន់ទីផ្សារអន្តរជាតិ ពិសេសទីផ្សារចិនបានជាង ២ពាន់តោនក្នុងមួយខែៗ រួមនឹងការផ្គត់ផ្គង់ទីផ្សារក្នុងស្រុកនៅតាមផ្សារទំនើប និង ភោជនីយដ្ឋាននានាផងដែរ ។ នេះបើតាមការឱ្យដឹងរបស់លោក ម៉ៅ ធនិនអភិបាលខេត្តកំពក្នុងសន្និសីទសារព័ត៌មានស្តីពី «ភាពជោគជ័យរយៈពេល៥ឆ្នាំ របស់រដ្ឋបាលខេត្តកំពត»នៅទីស្តី ការ គណៈរដ្ឋមន្ត្រី នាថ្ងៃទី១៦ ខែកុម្ភៈ ឆ្នាំ២០២៣។
លោកបានឱ្យដឹងទៀតថាបច្ចុប្បន្ននេះ មានក្រុមហ៊ុនចំនួន២កំពុងវិនិយោគដាំដុះចេកអំបូងលឿង នៅក្នុងខេត្តកំពត ដោយបានផ្តល់ការ ងារដល់ពលរដ្ឋខ្មែរ ប្រមាណ២ពាន់នាក់។ ចំការចេកនេះ មិនត្រឹមតែផ្តល់ចំណូលពីការនាំចេញទៅទីផ្សារអន្តរជាតិ និងក្នុងស្រុក ព្រម ទាំងបង្កើតការងារប៉ុណ្ណោះទេ ថែមទាំងជាតំបន់ទេសចរណ៍ផងដែរ ដោយមានភ្ញៀវទេសចរជាច្រើន បាននាំគ្នាទៅទស្សនាពីការដាំចេកនៅតំបន់នោះ។
លោកបានគូសបញ្ជាក់ថា ចេកអំបូងលឿងរបស់ខេត្តកំពត មានឱជារសផ្អែមឆ្ងាញ់ ក្រអូបឈ្ងុយមុត ដោយសារកត្តាបី គឺដីដែលមានជីវជាតិល្អទឹកស្រោចស្រពជាប្រភេទទឹកជ្រោះ ដែលគ្មានសារធាតុគីមី និងកត្តាអាកាសធាតុ ដែលធ្វើឱ្យចេកមានពណ៌សម្បុរស្រស់ស្អាត។ដោយសារចេកអំបូងលឿង មានទីផ្សារល្អក្រុមហ៊ុនមានផែនការពង្រីកផ្ទៃដីដាំដុះផងដែរ។
លោក ចាន់ រិទ្ធិ ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តកំពតបានឱ្យដឹងថា ចេកអំបូងលឿងត្រូវបានដាំដុះលើផ្ទៃដីចំនួន១ ០៦៣ ហិកតា ក្នុងនោះផ្ទៃដីដែលកំពុងប្រមូលផលមានចំនួន ៦៦១ហិកតា ដោយទទួលបានទិន្នផលចំនួន៤៣តោនក្នុងមួយហិកតា។ក្នុងមួយឆ្នាំៗ ដំណាំនេះនាំចេញបានប្រមាណជាង ២០ម៉ឺនតោន។
យោងតាមរបាយការណ៍របស់ក្រសួងកសិកម្ម រយៈពេល១១ខែ ឆ្នាំ២០២២ កម្ពុជានាំចេញផ្លែចេកស្រស់ទៅកាន់ទីផ្សារអន្តរជាតិ ចំនួន ៣៤៥,៤៧០តោន៕ដោយៈសុិរីមតី
