ភ្នំពេញ៖ ពលរដ្ឋនាំគ្នាដេញចាប់បានបុរស២នាក់បន្ទាប់ពីឆក់ទូរសព្ទស្ត្រីកំពុងដើរតាមផ្លូវបង្កការភ្ញាក់ផ្អើលនៅផ្លូវត្រសក់ផ្អែម សង្កាត់បឹងរាំង ខណ្ឌដូនពេញ កាលពីវេលាទៀបថ្ងៃទី១៧ ខែកុម្ភៈ។
![](https://cambodiaflashnews.com/wp-content/uploads/2021/06/top-banner.gif)
ស្ត្រីរងគ្រោះបានឱ្យដឹងថា មុនកើតហេតុ នាងបានដើរចេញពីផ្ទះជួលទៅរកទិញចំណី។ពេលកំពុងដើរស្រាប់តែមានបុរស២នាក់ ជិះម៉ូតូស៊ុយស៊ុយគីនិចផ្លាកលេខភ្នំពេញ1FZ.6478 មកឈប់ក្បែរ។ភ្លាមៗនោះបុរសជិះខាងក្រោយបានស្ទុះមកឱបនាងរួចឆក់យកទូរសព្ទពីនាងហើយរត់គេចខ្លួនតែម្តង។
ស្ត្រីរងគ្រោះបានបន្តថា ក្រោយបក្ខពួកឆក់ទូរសព្ទរួចរួត់ នាងក៏ទៅចាប់ក្របួច.កអាវអ្នកបើកម៉ូតូបណ្តាលឱ្យដួល។ជនសង្ស័យទាំង២នាក់បានរត់ចោលម៉ូតូ ហើយនាងក៏បានស្រែកឆោឡោឡើង បង្កការភ្ញាក់ផ្អើលត្រូវពលរដ្ឋជួយដេញតាមចាប់បានទាំង២នាក់ យកប្រគល់ឱ្យសមត្ថកិច្ច។ក្រោយមកកម្លាំងនគរបាលបាននាំជនសង្ស័យទាំង២នាក់ រួមទាំងម៉ូតូយកទៅប៉ុស្តិ៍រដ្ឋបាលបឹងរាំងដើម្បីបន្តនីតិវិធី៕ដោយ៖វិចិត្រ