ប្រទេសចិនដាក់បញ្ចូលក្រុមហ៊ុនLockheed Martin និង Raytheon អាម៉េរិកចូលក្នុងបញ្ជីទណ្ឌកម្មអង្គភាពមិនទុកចិត្ត ខណៈក្រុមហ៊ុនទាំងនេះបានលក់អាវុធទៅឲ្យតៃវ៉ាន់។
![](https://cambodiaflashnews.com/wp-content/uploads/2021/06/top-banner.gif)
ក្រសួងពាណិជ្ជកម្មចិនបាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា “ក្រុមហ៊ុន Lockheed Martin Corp (LMT.N) និងក្រុមហ៊ុន Raytheon Missile and Defense Corp ដែលជាក្រុមហ៊ុនបុត្រសម្ព័ន្ធរបស់ Raytheon Technologies Corp (RTX.N) ត្រូវបានហាមឃាត់មិនឱ្យ “ចូលរួមក្នុងសកម្មភាពនាំចូល និងនាំចេញដែលទាក់ទងនឹងប្រទេសចិនទៀតឡើយ”។ ទីក្រុងប៉េកាំងក៏បានហាមប្រាមក្រុមហ៊ុនទាំងនេះពីការវិនិយោគបន្ថែមនៅក្នុងប្រទេសចិន រារាំងអ្នកគ្រប់គ្រងជាន់ខ្ពស់មិនឱ្យចូលប្រទេស លុបចោលការអនុញ្ញាតឱ្យស្នាក់នៅសម្រាប់បុគ្គលិកនៅក្នុងប្រទេសចិន និងពិន័យជាប្រាក់ទ្វេដងនៃចំនួនកិច្ចសន្យាលក់អាវុធរបស់ពួកគេទៅឱ្យតៃវ៉ាន់ផងដែរ។
ជាការឆ្លើយតប ក្រុមហ៊ុន Lockheed ដែលនាំចេញទៅកាន់ប្រទេសជាង ៧០ បាននិយាយនៅក្នុងសេចក្តីថ្លែងការណ៍វិញថា “ការលក់អាវុធយោធាទៅបរទេសគឺជាប្រតិបត្តិការរវាងរដ្ឋាភិបាលទៅរដ្ឋាភិបាល ហើយយើងធ្វើការយ៉ាងជិតស្និទ្ធជាមួយរដ្ឋាភិបាលសហរដ្ឋអាម៉េរិកលើការលក់អាវុធណាមួយដល់អតិថិជនអន្តរជាតិ។ ក្រុមហ៊ុន Lockheed Martin ប្រកាន់ខ្ជាប់យ៉ាងជិតស្និទ្ធជាមួយរដ្ឋាភិបាលសហរដ្ឋអាម៉េរិក។ គោលនយោបាយទាក់ទងនឹងការធ្វើអាជីវកម្មជាមួយរដ្ឋាភិបាលបរទេស”។ ចំណែកក្រុមហ៊ុន Raytheon Technologies ដែលលក់ម៉ាស៊ីនយន្តហោះ Pratt & Whitney របស់ខ្លួន ក៏ដូចជាឧបករណ៍ចុះចត និងឧបករណ៍បញ្ជាទៅឱ្យឧស្សាហកម្មអាកាសចរណ៍ពាណិជ្ជកម្មរបស់ប្រទេសចិនមិនបានឆ្លើយតបនោះទេ។ អ្នកនាំពាក្យសេតវិមាន Karine Jean-Pierre បានប្រាប់អ្នកយកព័ត៌មានកាលពីថ្ងៃព្រហស្បតិ៍ដែរថា “ទាំងនេះគឺជាវិធានការឥតប្រយយោជន៍ និងមិនចាំបាច់ – យើងបានគិតហើយថាចិននឹងធ្វើដូច្នេះ”។
វិធានការនេះកើតឡើងចំពេលមានភាពតានតឹងកាន់តែខ្លាំងឡើង បន្ទាប់ពីយោធាអាម៉េរិកបានបាញ់ទម្លាក់នូវអ្វីដែលខ្លួននិយាយថាជាបាឡុងចារកម្មរបស់ចិន ហើយមួយថ្ងៃបន្ទាប់មក ទីក្រុងប៉េកាំងក៏បានព្រមានទៅវិញអំពីថានឹងឆ្លើយតបនឹងបាឡុងអាម៉េរិកដែលហោះជាង១០ដងលើតំបន់ស៊ីនជាំង ទីបេត៍ជាដើម៕
ប្រភព៖ REUTERS
ប្រភពរូប៖REUTERS
ប្រែសម្រួល៖សុខ តុលា