បន្ទាយមានជ័យ៖សមត្ថកិច្ចកំពុងបើកការស៊ើបអង្កេត ក្រោយពីប្រជាពលរដ្ឋប្រទះឃើញសពស្អុយ រលួយសល់តែគ្រោងឆ្អឹង មិនដឹងស្លាប់ពីពេលណា និងមូលហេតុអ្វីនោះទេ។
លោកវរសេនីយ៍ត្រី រិន ឡឹប នាយប៉ុស្តិ៍ឃុំស្លក្រាមបានឱ្យដឹងថា ករណីបង្កការភ្ញាក់ផ្អើលនោះ នៅម្តុំអូរគៀប ភូមិស្លក្រាម ឃុំស្លក្រាម ស្រុកស្វាយចេក កាលពីថ្ងៃទី១៦ ខែកុម្ភៈ។
មុនហេតុការណ៍កើតឡើង មានពលរដ្ឋឈ្មោះឡុង គឹមឡាង អាយុ១៨ឆ្នាំ ជាអ្នកដាំបាយឱ្យតៃកុងគ្រឿងចក្រ បានប្រទះឃើញមនុស្សស្លាប់មានសភាពស្អុយរលួយ។ សពមិនទាន់ស្គាល់អត្តសញ្ញាណនៅឡើយ ភេទប្រុស អាយុចន្លោះពីជាង៥០ទៅ៦០ឆ្នាំ ស្លៀកខោកីឡាពណ៌ខៀវឆ្នូតក្រហម អាវដៃវែងការ៉ូពណ៌ស-ខ្មៅ។
នាយប៉ុស្តិ៍ដដែលបានបន្តថា ក្រោយពីទទួលបានព័ត៌មាន កម្លាំងសមត្ថកិច្ចបាន បង្កើតគណៈកម្មការត្រួតពិនិត្យសាកសព មានការចូលរួមពីគ្រូពេទ្យមណ្ឌលសុខភាពឃុំស្លក្រាម-នាយផ្នែកយុត្តិធម៌-នាយរងផ្នែកពិនិត្យវិភាគ-និងអាជ្ញាធរមូលដ្ឋាន។តាមការត្រួតពិនិត្យលើសាកសពក្នុងស្ថានភាពស្អុយរលួយនោះ សមត្ថកិច្ចមិនអាចបញ្ជាក់បានពីមូលហេតុឱ្យបានច្បាស់លាស់នៅឡើយដោយបន្តបើកការស៊ើបអង្កេតក្នុងករណីនេះ៕ដោយ៖វិចិត្រ