មេកោយទាហានស៊ីឈ្នួលរុស្ស៊ី ហៅថា Wagner Group បាននិយាយថា រុស្ស៊ីអាចនឹងវាយឡោមព័ទ្ធបានទីក្រុង Bakhmut គឺនៅចន្លោះខែមីនា និងមេសា ឆ្នាំ២០២៣នេះ។
![](https://cambodiaflashnews.com/wp-content/uploads/2021/06/top-banner.gif)
នេះបើយោងតាមសេចក្តីរាយការណ៍របស់សារព័ត៌មានរដ្ឋរុស្ស៊ី Ria Novosti បានដកស្រង់សម្ដីរបស់លោក Yevgeny Prigozhin ស្ថាបនិកក្រុមទាហានស៊ីឈ្នួល Wagner របស់រុស្ស៊ីនិយាយកាលពីថ្ងៃទី ១៥ ខែកុម្ភៈ ក្នុងនោះរុស្ស៊ីនឹងវាយឡោមព័ទ្ធយកទីក្រុង Bakhmut ក្នុងតំបន់ខេត្តDonetsk បាននៅក្នុងខែមីនា ឬខែមេសា។ លោក Prigozhin ថា “វាជារឿងពិបាកនឹងទស្សន៍ទាយ ហើយភាពជោគជ័យរបស់រុស្ស៊ីក្នុងការវាយឡោមព័ទ្ធជុំវិញទីក្រុងនោះ មួយផ្នែក គឺអាស្រ័យលើបរិមាណសព្វាវុធរបស់លោកខាងលិចដែលបានផ្គត់ផ្គង់ដល់អ៊ុយក្រែន”។ ហើយកាលពីថ្ងៃទី ១១ ខែកុម្ភៈ ដូចដែលបានរាយការណ៍ដោយសារព័ត៌មាន Reuters Prigozhin ក៏បានអះអាងថាវាអាចចំណាយពេលពីរឆ្នាំសម្រាប់ទីក្រុងមូស្គូដើម្បីចាប់យកតំបន់ខេត្ត Donetsk និង Luhansk ទាំងមូល ។ ហើយប្រសិនបើវាយដល់ទន្លេ Dnipro នោះវានឹងចំណាយពេលប្រហែលបីឆ្នាំ។
របាយការណ៍ចេញបន្តបន្ទាប់ ខណៈដែលលោក Serhii Cherevatyi អ្នកនាំពាក្យក្រុមភាគខាងកើតនៃកងកម្លាំងប្រដាប់អាវុធអ៊ុយក្រែន ក៏បាននិយាយតាមទូរទស្សន៍ជាតិថា ទាហានរុស្ស៊ីបានបាត់បង់មនុស្ស ១១៩ នាក់ស្លាប់ និង ១៦៣ នាក់រងរបួសនៅជិត Bakhmut ក្នុងរយៈពេល ២៤ ម៉ោងចុងក្រោយថ្ងៃទី ១៥ ខែកុម្ភៈ។ ការប្រយុទ្ធគ្នាកំពុងបន្តយ៉ាងសាហាវ កំពុងបាញ់ទៅបាញ់មក ហើយមិនទាន់មានការជឿនលឿនពីភាគីណាមួយនោះទេ៕
ប្រភព៖ Ukrainska Pravda
ប្រភពរូប៖ Ukrainska Pravda
ប្រែសម្រួល៖សុខ តុលា