ខេត្តព្រះសីហនុ៖ពលរដ្ឋចំនួន២៤នាក់ មានអាការដែលគេអះអាងថាបានពុលចំណីអាហារ ដោយហូបបាញ់ហយ-ញាំ-នំបញ្ចុកក្នុងពិធីជួបជុំមួយ ត្រូវដឹកទៅសង្គ្រោះនៅមន្ទីរពេទ្យ។ហេតុការណ៍នេះស្ថិតនៅភូមិក្រាំងអាត់ ឃុំ/ស្រុកកំពង់សីលា ខេត្តព្រះសីហនុ កាលពីថ្ងៃទី១៥ ខែកុម្ភៈ។
![](https://cambodiaflashnews.com/wp-content/uploads/2021/06/top-banner.gif)
ក្រោយពីទទួលបានព័ត៌មានថាមានពលរដ្ឋចំនួន ២៤នាក់ពុលចំណីអាហារភ្លាម លោកគួច ចំរើន អភិបាលខេត្តព្រះសីហនុបានចុះសាកសួរសុខទុក្ខ និងនាំយកថវិការបស់សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ឧបត្ថម្ភដល់បងប្អូនចំនួន២៤នាក់។ ក្នុងនោះម្នាក់ៗទទួលបានថវិកា១០ម៉ឺនរៀល និងជួយឧបត្ថម្ភមណ្ឌលសុខភាពតក្កវិទ ចំនួន១លានរៀល។
ជុំវិញករណីពុលចំណីអាហារនេះ ប្រភពពីមន្ត្រីមូលដ្ឋានបានឱ្យដឹងថា បងប្អូនដែលមានអាការក្អួតចង្អោរ-ចុកពោះ-ងើបមិនរួច ពួកគាត់បានចូលរួមក្នុងពិធីជួបជុំមួយកាលពីយប់ថ្ងៃទី១៣ ខែកុម្ភៈមកម្ល៉េះ។នៅថ្ងៃទី១៤កុម្ភៈ បន្ទាប់មួយថ្ងៃ បងប្អូនទាំងនោះមិនទាន់មានអាការធ្ងន់ធ្ងរទេ គ្រាន់តែមានស្ថានភាពចុកឆ្អល់និងក្អួតខ្លះៗតែប៉ុណ្ណោះ។
ប៉ុន្តែរហូតដល់ល្ងាចថ្ងៃទី១៥កុម្ភៈ ស្ថានភាពបងប្អូនកាន់តែដុនដាបរហូតមានចំនួនកើនដល់២៤ នាក់។ក្នុងនោះធ្ងន់ធ្ងរប្រមាណ៦នាក់ ទើបធ្វើឱ្យមានការភ្ញាក់ផ្អើលដល់អាជ្ញាធរ ហើយបានបញ្ជូនជនរងគ្រោះទៅមន្ទីរពេទ្យ។ បច្ចុប្បន្នពួកគាត់ទាំង២៤នាក់ មានសភាពធូរស្រាលដោយអ្នកខ្លះបានចេញទៅលំនៅវិញហើយ៕ដោយ៖វិចិត្រ