ភ្នំពេញ៖ថ្លែងនៅក្នុងកម្មវិធីបើកសន្និបាតបូកសរុបលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ នៅថ្ងៃទី១៥ ខែកុម្ភៈ ឆ្នាំ២០២៣ លោកទេសរដ្ឋមន្ដ្រីបានលើកឡើងថា គម្រោងផ្លូវក្រវាត់ក្រុងទី៣អាចនឹងបញ្ចប់ការសាងសង់នៅខែឧសភា ឬខែមិថុនា ខាងមុខនេះហើយ។គម្រោងនេះត្រូវបានសាងសង់យឺតយ៉ាវរយៈពេល១ឆ្នាំដោយសារបញ្ហាមួយចំនួន ពិសេសគឺការផ្ទុះឡើងនៃវីរុសកូវីដ១៩។
លោកបានបញ្ជាក់ថា ៖ទោះជាមានការយឺតយ៉ាវក៏ដោយ ក៏ប៉ុន្ដែយើងសង្ឃឹមថាចប់នៅខែ ៥ ឬខែ ៦ ដើម្បីដាក់ឲ្យប្រើប្រាស់ជាផ្លូវការមុនយុទ្ធនាការបោះឆ្នោតនៅឆ្នាំ២០២៣។
សូមជម្រាបផងដែរថា គម្រោងផ្លូវក្រវាត់ក្រុងខ្សែទី ៣ នេះមានប្រវែងសរុប ៥២,៩៨៣ គីឡូម៉ែត្រ មានទទឹង ២២ ម៉ែត្រ មាន ៤ គន្លង តភ្ជាប់ពីផ្លូវជាតិលេខ ៦ លេខ ៥ លេខ ៤ លេខ ៣ លេខ ២ រហូតដល់ផ្លូវជាតិលេខ ១ កាត់ភូមិសាស្ត្ររាជធានីភ្នំពេញ និងខេត្តកណ្តាល ដោយប្រើប្រាស់ថវិកាលើការសាងសង់ចំនួន ២៦៧,៦៧ លានដុល្លារអាមេរិក៕ដោយៈផាវី
