សហរដ្ឋអាម៉េរិកព្រមានអ៊ុយក្រែនថា ចូរប្រុងជើងការឲ្យបានល្អ ខណៈសង្រ្គាមកំពុងឈានជិតដល់ចំណុចសំខាន់ខួបមួយឆ្នាំហើយ។
![](https://cambodiaflashnews.com/wp-content/uploads/2021/06/top-banner.gif)
កាសែត The Washington Post បានដកស្រង់ការព្រមាននេះពីបណ្តាមន្រ្តីជាន់ខ្ពស់អាម៉េរិក ព្រមទាំងប្រធានាធិបតីចូបៃដិនថា “សង្រ្គាមក្នុងរយៈពេលប៉ុន្មានខែថ្មីៗនេះ បានក្លាយទៅជាការវាយលុកយឺតៗនៅភាគខាងកើតអ៊ុយក្រែន ដោយភាគីទាំងពីរមិនទទួលបានអ្វីក្នុងកម្រិតកំពូលណាមួយសោះឡើយ”។ មន្រ្តីនៃរដ្ឋបាល Biden ជាន់ខ្ពស់ភាគច្រើនជឿជាក់ថា ចំណុចប្រសព្វដ៏សំខាន់នឹងមកដល់នៅនិទាឃរដូវខាងមុខនេះ នៅពេលដែលរុស្ស៊ីត្រូវបានគេរំពឹងថានឹងចាប់ផ្តើមការវាយលុកទ្រង់ទ្រាយថ្មីខ្លាំង ហើយអ៊ុយក្រែននឹងបន្តទប់ទល់បង្កើនការវាយលុកបកវិញក្នុងកិច្ចប្រឹងប្រែងមួយដើម្បីដណ្តើមយកទឹកដីដែលបាត់បង់មកវិញ។
កាលពីថ្មីៗនេះ នាយកស៊ើបការណ៍សម្ងាត់អាម៉េរិក CIA លោក William Burns បានទៅទស្សនកិច្ចនៅអ៊ុយក្រែន។ លោកបានប្រាប់ប្រធានាធិបតីអ៊ុយក្រែនលោក Volodymyr Zelenskyy អំពីផែនការយោធារបស់រុស្ស៊ីសម្រាប់ប៉ុន្មានខែខាងមុខ ហើយបានបញ្ជាក់ពីយុទ្ធសាស្រ្តប្រុងជើងការនានាដែលត្រូវធ្វើ។ លើសពីនេះ បច្ចុប្បន្នរដ្ឋបាល Biden កំពុងធ្វើការជាមួយសភា ដើម្បីអនុម័តជំនួយថវិកាផ្ទាល់ចំនួន ១០ ពាន់លានដុល្លារផ្សេងទៀតដល់ទីក្រុង Kyiv ហើយត្រូវបានគេរំពឹងថានឹងប្រកាសកញ្ចប់ជំនួយយោធាដ៏សំខាន់មួយផ្សេងទៀតនៅ សប្តាហ៍ក្រោយ និងដាក់ទណ្ឌកម្មថ្មីលើវិមានក្រឹមឡាំងក្នុងពេលតែមួយ៕
ប្រភព៖France 24
ប្រភពរូប៖France 24
ប្រែសម្រួល៖សុខ តុលា