ប្រធានាធិបតីអ៊ុយក្រែន លោក Volodymyr Zelensky បាននិយាយថា ស្ថានភាពសមរភូមិជួរមុខនៃខេត្តដូណេតភាគខាងកើតនៅសប្តាហ៍នេះគឺពិបាកខ្លាំងបំផុតហើយ រុស្ស៊ីសម្រុកបុកខ្លាំងក្នុងគោលបំណងដើម្បីឆាប់បានដណ្តើមកាន់កាប់។
ការជូនដំណឹងនេះ បានធ្វើឡើងកាលពីថ្ងៃអង្គារ ទី ១៤ ខែកុម្ភៈ ឆ្នាំ២០២៣ ដោយប្រធានាធិបតីអ៊ុយក្រែនផ្ទាល់ គឺលោក Volodymyr Zelensky។ លោកស្គីនិយាយថា ស្ថានភាពនៅជួរមុខអ៊ុយក្រែនគឺ “ពិបាកខ្លាំងណាស់” ជាពិសេសនៅក្នុងតំបន់ភាគខាងកើតរបស់ប្រទេស ខណៈរុស្ស៊ីស្វែងរកការគ្រប់គ្រងពេញលេញ។ ដោយបានបញ្ជាក់ក្នុងសម្រង់សម្ដី លោកស្គីថា សមរភូមិនោះគឺស្ថិតក្នុងខេត្តដូណេត និងលូហាន់ ជាមួយនឹងការបាញ់ផ្លោងកាំភ្លើងធំខ្មៅមេឃ។ លោកនិយាយដោយខ្លីថា “វាកំពុងពិបាកខ្លាំងណាស់”។
ដោយឡែកងាកមកសម្រង់ព័ត៌មានពីខាងរុស្ស៊ីវិញ លោក Yevgeny Prigozhin ដែលជាប្រធានអង្គការយោធាស៊ីឈ្នួលរុស្ស៊ី Wagner Group ក៏បានទទួលស្គាល់កាលពីថ្ងៃអង្គារដែរថា ទីប្រជុំជន Bakhmut របស់អ៊ុយក្រែនក្នុងខេត្តដូណេត គឺមិនទាន់ត្រូវបានកងកម្លាំងរុស្ស៊ីកាន់កាប់បានទេ។ ក្រុមទំនាក់ទំនងរបស់ Prigozhin បាននិយាយតាមរយៈ Telegram ថា “យើងនឹងមិនច្បាស់ពីការចាប់យកវានោះទេ” ។ “ព្រោះ Bakhmut កំពុងតែមានការតស៊ូខ្លាំង… ម៉ាស៊ីនកាំភ្លើងធំកំពុងដំណើរការ”។
យោងតាមទីភ្នាក់ងារ AFP ទាហានស៊ីឈ្នួលរបស់ Prigozhin បានកត់សម្គាល់ឲ្យដឹងក្នុងប៉ុន្មានថ្ងៃថ្មីៗនេះថា កងកម្លាំងរុស្ស៊ីបានចាប់យកទីតាំងជិតខាងជាបន្តបន្ទាប់ក្នុងការប៉ុនប៉ងឡោមព័ទ្ធទីក្រុង Bakhmut ហើយថាកងកម្លាំងអ៊ុយក្រែនបានវាយទប់ទល់យ៉ាងសកម្ម ហើយបានបញ្ជូនទុនបម្រុងថ្មីគ្រប់ពេល។ ជារៀងរាល់ថ្ងៃ យុទ្ធជនអ៊ុយក្រែនចន្លោះពី ៣០០ ទៅ ៥០០ នាក់បានមកដល់ Bakhmut ការបាញ់កាំភ្លើងធំៗកើនឡើងជារៀងរាល់ថ្ងៃ។ ដូច្នេះ “សម្រាប់ពេលនេះ គ្មានការរំពឹងទុកណាមួយដែលអ៊ុយក្រែននឹងបោះបង់ទឹកដីរត់ចោលសមរភូមិដោយគ្មានការប្រយុទ្ធនោះទេ”៕
ប្រភព៖AFP
ប្រភពរូប៖AFP
ប្រែសម្រួល៖សុខ តុលា
