សហភាពអឺរ៉ុប២៧ប្រទេស ត្រៀមជួបប្រជុំគ្នានៅថ្ងៃពុធនេះ ដើម្បីប្រកាសកញ្ចប់ទណ្ឌកម្មថ្មីដាក់លើរុស្ស៊ី ខណៈអាចនឹងកំណត់គោលដៅទាំងលើមន្រ្តី, មេដឹកនាំយោធា និងប្រព័ន្ធធនាគារ។
![](https://cambodiaflashnews.com/wp-content/uploads/2021/06/top-banner.gif)
ប្រធានគណៈកម្មាធិការប្រតិបត្តិការសហភាពអឺរ៉ុប លោកស្រី Ursula von der Leyen បាននិយាយកាលពីសប្តាហ៍មុនរួចហើយ បន្ទាប់ពីកិច្ចប្រជុំកំពូលជាមួយប្រធានាធិបតីអ៊ុយក្រែន លោក Volodymyr Zelenskiy ដោយថាសហភាពនឹងជួបជុំគ្នាផ្លូវការនៅថ្ងៃពុធ ទី១៥ ខែកុម្ភៈ ឆ្នាំ២០២៣ ដើម្បីធ្វើការដាក់ទណ្ឌកម្មលើអ្នកនយោបាយ និងមេដឹកនាំយោធាមួយចំនួនរបស់ រុស្ស៊ី ក៏ដូចជាអ្នកឃោសនាកុហកបំពុលសង្គមសាធារណៈរុស្ស៊ី និងបរទេស។ តាមប្រភពមិនបញ្ចេញឈ្មោះ បានឲ្យដឹងថា លោកស្រីប្រធាន បានស្នើឲ្យសហភាពគួរតែកំណត់គោលដៅកាត់ផ្តាច់ប្រព័ន្ធទូទាត់សកលលើធនាគាររុស្ស៊ីចំនួន៤ បន្ថែមទៀតរួមទាំងធនាគារឯកជន Alfa-Bank ,ធនាគារអនឡាញ Tinkoff និងអ្នកផ្តល់ប្រាក់កម្ចីពាណិជ្ជកម្ម Rosbank។ លើសពីនេះ ក៏មានការហាមប្រាមលើសារធាតុជ័រកៅស៊ូ និងសារធាតុគីមីផងដែរ ក្នុងគោលបំណងដើម្បីបង្អាក់ខ្សែចង្វាក់ផលិតអាវុធ និងឧបករណ៍ប្រយុទ្ធដាក់ពង្រាយនៅអ៊ុយក្រែន។
តាមរយៈកញ្ចប់ទណ្ឌកម្មនេះ លោកស្រីប្រធានសហភាពបាននិយាយថា “វានឹងហាមឃាត់ការនាំចេញរបស់រុស្ស៊ីបន្ថែមក្នុងទឹកប្រាក់រហូតដល់ ១០ ពាន់លានអឺរ៉ូ (ស្មើនឹង១០,៧ ពាន់លានដុល្លារ) ដែលនឹងធ្វើឱ្យក្បាលម៉ាស៊ីនយោធារបស់រុស្ស៊ីកាន់តែស្រេកឃ្លាន និងបន្តអង្រួនមូលដ្ឋានគ្រឹះនៃសេដ្ឋកិច្ចរបស់រុស្ស៊ី”៕
ប្រភព៖ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា