រុស្ស៊ីត្រៀមវាយលុកតាមអាកាសវាយផ្តាច់បំបែកអ៊ុយក្រែននាពេលឆាប់ៗនេះ ខណៈរបាយការណ៍អង្គការណាតូបានបង្ហាញថា រុស្ស៊ីបានប្រមូលផ្តុំកងយន្តហោះចម្បាំងនៅតាមព្រំដែនបណ្តើរៗហើយ។
![](https://cambodiaflashnews.com/wp-content/uploads/2021/06/top-banner.gif)
មន្ត្រីអង្គការណាតូបាននិយាយកាលពីថ្ងៃអង្គារថា ប្រព័ន្ធការពារដែនអាកាសត្រូវតែប្រញាប់ដាក់ចូលទៅកាន់ប្រទេសអ៊ុយក្រែនឲ្យបានលឿនតាមដែលអាចធ្វើទៅបាន ដើម្បីទប់ទល់ជាមួយនឹងការវាយលុកថ្មីរបស់រុស្ស៊ី ដែលនឹងធ្វើឡើងនាពេលខាងមុខ។ ប្រមុខការពារជាតិ អាម៉េរិក លោក Lloyd Austin បាននិយាយនៅឯទីស្នាក់ការរបស់អង្គការណាតូក្នុងទីក្រុងប្រ៊ុចសែល ជាកន្លែងដែលក្រុមមន្ត្រីកំពុងជួបប្រជុំនោះ បានកត់សម្គាល់ថា ការការពារដែនអាកាសរបស់អ៊ុយក្រែននៅពេលនេះ “មិនគ្រប់គ្រាន់ទេ ហើយយើងនឹងបន្តជំរុញរហូតដល់អ៊ុយក្រែនទទួលបានបន្ថែមទៀត។ Austin បានបន្ថែមថា “រុស្ស៊ីមានយន្តហោះចម្បាំងយ៉ាងច្រើន និងសមត្ថភាពជាច្រើននៅសល់” ។ “ដូច្នេះយើងចង់ធ្វើឲ្យប្រាកដនូវសមត្ថភាពដើម្បីបន្តជួយការពារដល់អ៊ុយក្រែនទប់ជាមួយរុស្ស៊ី”។ កាសែត Financial Times បានដកស្រង់សម្តីមន្ត្រីការពារជាតិអាម៉េរិកពីររូបដែលនិយាយថា របាយការណ៍ចារកម្មរបស់អង្គការណាតូរកឃើញថា រុស្ស៊ីកំពុង“ប្រមូលផ្តុំយន្តហោះស្លាបថេរ និងយន្តហោះចម្បាំងចល័តនៅជិតព្រំដែនជាមួយអ៊ុយក្រែន”។
មនុស្សម្នាក់ទៀតបានប្រាប់កាសែត Times ថា “កងកម្លាំងនៅលើដីរបស់រុស្ស៊ីមានការថយចុះយ៉ាងខ្លាំង ដូច្នេះពួកគេនឹងប្រែក្លាយវាទៅជាការប្រយុទ្ធតាមផ្លូវអាកាសវិញ” ។ “ប្រសិនបើប្រជាជនអ៊ុយក្រែននឹងអាចរស់បាន ពួកគេត្រូវមានសមត្ថភាពការពារអាកាស និងគ្រាប់រំសេវច្រើនតាមដែលអាចធ្វើទៅបានផងដែរ”។ ជុំវិញរបាយការណ៍ដ៏កំពុងឡើងកម្តៅនេះ នៅពេលសួរថាតើសម្ព័ន្ធមិត្តរបស់អ៊ុយក្រែនបានពិភាក្សាអំពីបញ្ហានៃការបញ្ជូនយន្តហោះចម្បាំងទៅជួយអ៊ុយក្រែន ឬអត់ Austin ប្រមុខការពារជាតិអាម៉េរិកបាននិយាយថា “ខ្ញុំមិនមានសេចក្តីប្រកាសណាមួយដែលត្រូវធ្វើនៅថ្ងៃនេះទេ”៕
ប្រភព៖ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា