សហរដ្ឋអាម៉េរិក ប្រកាសអាសន្នចុងក្រោយឲ្យប្រជាជនខ្លួនទាំងអស់ប្រញាប់ចាកចេញពីទឹកដីរុស្ស៊ីជាបន្ទាន់ ខណៈដែលស្ថានការណ៍សង្រ្គាមប្រថុយប្រថាន អំណាចទូតមិនអាចគ្រប់គ្រងសព្វជ្រុងជ្រោយនោះទេ។
សហរដ្ឋអាម៉េរិកកាលពីថ្ងៃចន្ទសប្តាហ៍នេះ បានចេញសេចក្តីណែនាំកម្រិត៤ ដែលជាកម្រិតអាសន្នខ្ពស់បំផុតមួយទៅកាន់ពលរដ្ឋអាម៉េរិកដែលកំពុងរស់នៅ ចេញចូលប្រទេសរុស្ស៊ី។ សេចក្តីណែនាំបាននិយាយថា ពលរដ្ឋអាម៉េរិកទាំងអស់គួរតែចាកចេញពីប្រទេសរុស្ស៊ីជាបន្ទាន់ ហើយបញ្ឈប់ការធ្វើដំណើរផ្សេងៗទៅកាន់ប្រទេសនេះទៀត ខណៈដែលសង្រ្គាមឈ្លានពានអ្នកជិតខាងអ៊ុយក្រែននៅតែបន្តខ្លាំងឡើងៗមិនបានថមថយនោះទេ។ ក្រសួងបានលើកឡើងពីហានិភ័យនៃការយាយី និងការឃុំឃាំងធ្វើឡើងដោយអាជ្ញាធររុស្ស៊ី។ សម្រង់សម្ដី “កុំធ្វើដំណើរទៅប្រទេសរុស្ស៊ីឲ្យសោះ ដោយសារផលវិបាកដែលមិនអាចទាយទុកជាមុនបាននៃការឈ្លានពានពេញលេញលើអ៊ុយក្រែនដោយកងកម្លាំងយោធារុស្ស៊ី សក្តានុពលនៃការយាយី និងការចាប់ឃុំខ្លួនដោយមន្ត្រីសន្តិសុខរដ្ឋាភិបាលរុស្ស៊ី ការអនុវត្តច្បាប់ក្នុងតំបន់តាមអំពើចិត្ត។ ការហោះហើរចូល និងចេញពីរុស្ស៊ីមានកំណត់ សមត្ថភាពរបស់ស្ថានទូតមានកម្រិតក្នុងការជួយពលរដ្ឋអាម៉េរិកនៅរុស្ស៊ី និងលទ្ធភាពនៃអំពើភេរវកម្ម”។
ឆ្លើយតបទៅកាន់សារព័ត៌មានរ៉យទ័រដោយច្រានចោលការព្រមានរបស់សហរដ្ឋអាម៉េរិក អ្នកនាំពាក្យវិមានក្រឹមឡាំង លោក Dmitry Peskov បាននិយាយថា វាមិនមែនជារឿងថ្មីនោះទេ៕
ប្រភព៖The HILL
ប្រភពរូប៖The HILL
ប្រែសម្រួល៖សុខ តុលា
